Bugun erkaklarning bayrami! Shuningdek, betakror Puerto-Riko kashf etilgan va tarixdagi eng mashhur siyosatchi ayollardan biri – indira Gandi dunyoga kelgan kun.

Butunjahon erkaklar kuni

19-noyabr sanasi Butunjahon erkaklar kuni deb eʼlon qilingan. Ushbu sana ilk marta bayram sifatida Trinidad va Tobagoda nishonlangan, keyin esa Avstraliya, Shimoliy Amerika, Osiyo, Yevropa va Birlashgan Millatlar Tashkilotiga aʼzo mamlakatlarga ham tarqalgan.

Bugungi kunda ushbu bayram dunyoning 80 dan ortiq mamlakatida doimiy ravishda nishonlab kelinadi.

Erkaklar kunini nishonlash gʻoyasi Vest-Indiya universiteti doktori Jerome Tiluksingxga tegishli boʻlgan. U erkaklarning oila va jamiyatdagi roliga urgʻu beruvchi bayram taʼsis etishni taklif qilgan. Ushbu kunni nishonlash uchun Tiluksingx 19-noyabr sanasi – oʻz otasining tugʻilgan kunini tanlab olgan. Shundan buyon har yilning 19 noyabr sanasida erkaklar kuni nishonlab kelinadi.

Puerto-Riko oroli kashf etilgan kun

Taniqli sayohatchi Xristofor Kolumb 1493-yilning 19-noyabr kunida Puerto-Rikoni kashf qilgan.

Ispan dengizchilari Kolumb boshchiligida gʻarbiy yarimshardagi orollarning biriga kelib oʻrnashishadi va uni San-Xuan oroli deb nomlashadi. Orolning maʼmuriy markazi sifatida Puerto-Riko (“boy port”) tanlab olinadi. Ammo, oʻtgan yillar davomida xaritashunoslar orol va shaharning nomini adashtirib qoʻyishadi. Shuning uchun ham bugungi kunda davlat Puerto-Riko, uning poytaxti esa San-Xuan deb ataladi.

Indira Gandi dunyoga kelgan kun

BBC talqiniga koʻra “Mingyillik ayoli”, “Hindistonning temir xonimi”, “Hind xalqining onasi”... Ushbu taʼriflarning barchasi Hindistonning uchinchi bosh vaziri Indira Gandiga tegishli. Indira Gandi koʻpchilik taxmin qilganidek Maxatma Gandining qarindoshi boʻlmagan, balki Hindistonning birinchi bosh vaziri Javohirlal Neru oilasida dunyoga kelgan.

Gandi familiyasini yosh Indira jurnalist va siyosatchi Feroz Gandi bilan oila qurgach, olgan. U bosh vazir lavozimiga saylangan dunyodagi ikkinchi ayol boʻlgan (birinchisi Shri-Lanka bosh vaziri Sirimavo Bandaranaike edi).

Yosh Indira 1955-yilda otasi Javohirlal Neru bilan birga Samarqand shahrida boʻlgan. U eng kuchli siyosatchi ayollardan biri sifatiga tarixga kirgan.

• Tarix
• qiziqarli