Odamning yoshi ulgʻayib borgani sayin unda demensiya va Alsgeymer kasalligi rivojlanishi xavfi ortadi. Keksalar orasida uchraydigan aqli zaiflikning davosi bugungi kunga qadar topilmagan, ammo uning rivojlanishi xavfini kamaytirish usullari mavjud. Tadqiqotlarning koʻrsatishicha, har kuni 30 daqiqa vaqtni videooʻyinlar uchun ajratish keksalar orasida aqli zaiflikning rivojlanish xavfini kamaytirar ekan.

Tadqiqotda 60 yoshdan 80 yoshgacha boʻlgan koʻngillilar ishtirok etganlar. Jarayon davomida ishtirokchilardan “Super Mario World”, “Angry Birds” kabi oʻyinlarni oʻynash soʻralgan, ularning xotirasi va kognitiv qobiliyatlari tekshirib turilgan.

Tadqiqot avvalida barcha ishtirokchilarning holati bir hil darajada boʻlgan. Oradan ikki hafta oʻtib esa videooʻyinlarga vaqt ajratgan ishtirokchilarda miyaning kognitiv qobiliyati yaxshilangani qayd etilgan.

Eslatib oʻtamiz, demensiya – koʻp hollarda keksalarga hujum qiluvchi kasallik. Bunda maʼlumotlarni qabul qilish qobiliyati yomonlashadi, xotira buzilishlari kuzatiladi, yillar davomida orttirilgan koʻnikmalar unutiladi, yangilarini esa oʻzlashtirish mumkin boʻlmay qoladi.

• salomatlik
• tadqiqot