Katta mashhurlikka erishgan “Guchchi uyi” filmidagi bosh qahramonlardan biri rolini ijro etish Ledi Gaganing ruhiy holatiga salbiy taʼsir koʻrsatdi. Buning natijasida ijodkor psixiatrga murojaat qilishga majbur boʻlgan.

Aktyorlar odatda rolga kirishish uchun yaxshigina qurbonliklar berishadi: Kristian Beyl bir ozib, bir semiradi, Jared Leto kuniga 10 soat vaqtini pardozxonada oʻtkazadi, Tom Kruz esa xavfli tryuklarni shaxsan oʻzi amalga oshirgancha, kaskadyorlar yordamidan voz kechadi.

Ledi Gaga “Guchchi uyi” filmidan keyin qahramonning dunyosiga shunchalar kirib ketganki, real hayot bilan aloqani butunlay yoʻqotgan va oʻziga kelib olish uchun psixiatr huzuriga borgan.

Turmush oʻrtogʻi Mauritsio Guchchini oʻldirish uchun qotil yollovchi Patrisiya Rejani obrazini mahorat bilan ijro etib berishni maqsad qilgan Ledi Gaga kundalik hayotda ham uning obrazidan chiqa olmay qolgan.

“Men italyancha aksent bilan gapira boshladim, xuddi erim bordek, u hozir ham qayerdadir mavjuddek his paydo boʻldi. Patrisiyaning hayoti yetarlicha qaygʻuli boʻlgan, ana shu qaygʻuni uyimga ham olib kirdim. Suratga olish ishlarida hammasi joyida emasligini tushundim va maydonchaga ham navbatchi psixiatr kelib turishini iltimos qildim”, deydi Ledi Gaga.

• Kino
• Madaniyat
• San’at
• mashhurlar