Kecha Saudiya Arabistoni va BAA milliy chempionatlarida o‘yinlar bo‘lib o‘tdi va u yerda to‘p surayotgan o‘zbekistonlik futbolchilar klublari safida navbatdagi o‘yinlarini o‘tkazishdi.

Saudiya Arabistoni

Terma jamoamiz lideri Jaloliddin Masharipov to‘p surayotgan “Al-Nasr” klubi yangi murabbiy bilan asta-sekin o‘ziga kelmoqda. Riyodliklar milliy chempionatning 14-turida “Al-Xazm”ni qabul qildi va 2:1 hisobida g‘alaba qozondi.

Masharipov o‘yinni hujum chizig‘ida to‘liq o‘tkazdi. Uchrashuv so‘ngida hamyurtimiz gol urishga ham erishdi, ammo VAR Jaloliddinning golini inobatga olmadi.

BAA

Otabek Shukurovning “Sharja” klubi BAA chempionatining 11-turida “Baniyas” darvozasiga javobsiz uchta to‘p kiritdi. O‘zbekistonlik futbolchi esa odatdagidek o‘yinni asosiy tarkibda boshlab, deyarli bexato harakat qildi. Markaziy yarim himoyachi 93-daqiqadagina zahiraga olindi.

Azizjon Gʻaniyev harakat qilayotgan “Shabob Al Ahli” so‘ngi turda “Al Dafra” ustidan qiyin g‘alabaga erishdi – 1:0. Uchrashuvni zahirada boshlagan hamyurtimiz ikkinchi bo‘limda maydonga tushirildi va faol harakati bilan jamoasi muvaffaqiyatiga munosib hissa qo‘shdi.

Ushbu g‘alabalardan so‘ng, “Shabob” hamda “Sharja” klublari BAA chempionatida 3 va 4-o‘rinlarni egallab turibdi.

• Futbol