Qamashi tumanida Tadbirkorlar va ishbilarmonlar harakati – O‘zbekiston Liberal-demokratik partiyasi tuman kengashi hamda Xalq deputatlari tuman kengashiga partiyadan saylangan deputatlarning partiya guruhi qo‘shma majlisi bo‘lib o‘tdi.

Qo‘shma yig‘ilishda partiya a’zosi, xalq deputatlari tuman kengashi deputati Nurtoyev Panji Norboyevichning partiya a’zosi, tuman kengashi deputati nomiga dog‘ tushiruvchi nojo‘ya xatti-harakatlari muhokama qilindi.

Panji Nurtoyev tomonidan maktab o‘quvchisi bo‘lgan yigitning nojo‘ya xatti-harakatlariga javob tariqasida ayovsiz kaltaklanganini hech narsa bilan oqlab bo‘lmasligi aytib o‘tilgan.

Qolaversa, mazkur voqeaga aniqlik kiritish maqsadida unga murojaat qilgan jurnalistning savollariga bergan bema’ni javoblari, xususan, ishlatilgan haqoratli so‘zlari nafaqat uning o‘zi, oilasiga, balki u a’zo bo‘lgan partiyaning obro‘siga, deputatlik sha’niga jiddiy dog‘ tushirgan.

O’zLiDeP Qamashi tuman kengashi o‘z vakolatlaridan kelib chiqib, o‘zining amaldagi qonunlarga zid harakatlari bilan partiya sha’niga dog‘ tushirgani uchun O'zLiDeP Ustavining 3.4. bandiga asosan Panji Nurtoyevni partiya safidan chiqarish masalasini ovozga qo‘ydi va deputat partiya safidan chiqarib yuborilgan.

• Deputat
• Qashqadaryo