Namangan viloyati Norin tumanida Innovatsion rivojlanish vazirligi tomonidan moliyalashtirilgan “Ichki va xalqaro turizmning “Uchtepa-Buloqmozor” majmuasi arxeologik yodgorliklarini o‘rganish va ularni moviy osmon ostidagi muzeyga aylantirish” mavzusidagi amaliy loyiha doirasida zardushtiylik davriga qadimiy ibodatxona aniqlandi. Bu haqda vazirlik axborot xizmati xabar berdi.
“O‘zbekiston insoniyat tamaddunining qadim beshiklaridan biridir. Namangan viloyatida kashf etilgan yana bir tarixiy yodgorlik buni ilmiy jihatdan isbotlash, arxeologiya fanini yangi ma’lumotlar bilan boyitish barobarida mamlakatimiz turizm salohiyatini yuksaltirishga ham hissa qo‘shishi mumkin”, – deyiladi xabarda.
Qayd etilishicha, akademik Ahmadali Asqarov boshchiligidagi ilmiy jamoa qazish ishlari davomida qadimgi tosh davriga oid, hududda zardushtiylik qarashlari va islom dinining keng tarqalishi bilan bog‘liq o‘ta noyob topilmalar hamda ibodatxonani topishgan.
“Biz qazishma ishlarini olib borishdan avval tepalik ostida qadimiy hukmdorning qabri va o‘sha davr an’analariga ko‘ra unga qo‘shib ko‘milgan boyliklar bo‘lsa kerak, deb taxmin qilgandik. Natijalar biz kutgandan ham a’lo bo‘ldi – qo‘lga kiritgan manbalarimizning ilmiy qimmati va ahamiyati beqiyos”, – deydi akademik A.Asqarov.
Olis tarixdan guvohlik beruvchi ko‘hna yodgorlik hududda shaharsozlik, tasviriy san’at, ilmiy-falsafiy dunyoqarash, yozuv madaniyati juda qadimdan rivojlanganidan dalolat beradi.
Avvalroq, Innovatsion rivojlanish vazirligi tomonidan moliyalashtirilgan va 2019-2020 yillarda amalga oshirilgan – “Axsikent Qoraxoniylar davri (XI-XII asrlar) tarixiy topografiyasi va uni turizm obyektiga aylantirish” mazusidagi loyiha ham ijobiy yakunlangan.
Namangan viloyatida joylashgan bu kabi tarixiy yodgorliklar va ochiq osmon ostidagi muzeylar silsilasida turizm yo‘nalishlari yaratilib, O‘zbekistonning ichki va xalqaro miqyosdagi turistik salohiyatini yuksaltirishga hissa qo‘shishi mumkin.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!