BMTning Bolalar jamg‘armasi (UNICEF) Afrika, Osiyo, Yaqin Sharq va Lotin Amerikasining notinchiliklar kuzatilayotgan 30 ta mamlakatida yashovchi bolalar haqidagi yangi hisobotini taqdim etdi. Bu haqda tashkilot matbuot xizmati xabar berdi.

Hisobotga ko‘ra, 2005-2020 yillar davomida bolalar huquqlarini buzilishi bilan bog‘liq 250 mingta holat aniqlangan. Bu har kuni 70 dan ortiq qoidabuzarlik sodir bo‘lgan darak beradi. Qolaversa, 104 100 dan oshiq bola qurolli mojarolarda halok va mayib bo‘lgan.

Shuningdek, 93 mingdan ortiq bolalar askarlikka jalb qilingan. Qurolli mojarolar ishtirokchilari tomonidan kamida 25 700 nafar bola o‘g‘irlab ketilgan. 14 200 nafar bola zo’rlangan, nikohga majburlangan, jinsiy ekspluatatsiya qilingan va jinsiy zo‘ravonlikning boshqa og‘ir shakllariga duchor qilingan.

Hisobot mualliflarining qayd etishicha, bolalar hamon qurolli to‘qnashuvlarning asosiy qurbonlari bo‘lib qolmoqda: ular askarlikka jalb qilinadi, bombardimon va o‘q ochish natijasida halok bo‘ladi, minalar yordamida portlatiladi. Ularning bir qismi Shifoxona va maktablarga qilingan hujumlar tufayli o‘qish va davolanish imkoniyatidan mahrum bo‘ladilar.

• Afrika
• BMT
• Osiyo