Misrshunoslar ilk marta firʼavn Amenxotep I ning mumiyosini “ochib koʻrishdi” va zamonaviy texnologiyalar yordamida uning tashqi koʻrinishi qanday boʻlganini aniqlashdi. Firʼavnning mumiyolangan jasadi mato boʻlaklariga oʻralgan va gulli tasmalar bilan bezalgan holatda topilgan. Uning yuz va boʻyin qismiga niqob joylashtirilgan, niqobning oʻzi esa qimmatbaho toshlar bilan bezatilgan. Matoni mumiyolangan jasadga zarar yetkazmasdan turib ochish imkoni boʻlmagan, aynan mana shuning uchun ham tadqiqotchilar uzoq yillar davomida mumiyoni ochishga qatʼiy qaror qila olishmagan.
Qohira muzeyi vakillari mumiyoni raqamli koʻrinishda ochish uchun kompyuter tomografiyasi texnologiyasidan foydalanganlar.
Firʼavn Amenxotepning mumiyosi miloddan avvalgi 11-asrda, jasad mumiyolangandan keyin oradan 400 yil vaqt oʻtib ilk marta ochib koʻrilgan. 21-sulola davrida kohinlar uning mumiyosini yangilab, qaytadan koʻmishgan.
Skanerlash jarayoni olimlarga firʼavnning suyaklari tuzilishini koʻrishga imkon bergan. Tadqiqotlar jarayonida firʼavn vafot etgan vaqtda 35 yoshda boʻlgani, boʻyi 169 santimetrni tashkil qilgani aniqlangan. Mumiyolangan jasad liboslari ustidan 30 ta tumor joylashtirib chiqilgan va bel qismiga sof oltindan ishlangan belbogʻ taqilgan.
Olimlar firʼavnning oʻlimiga sabab boʻladigan birorta ham jarohat yoki kasallik belgisini topa olishmagan. Mumiyoga koʻmilganidan keyin oʻgʻrilar tomonidan bir necha bor zarar yetkazilgan.
Maʼlumot uchun, Amenxotep mumiyosi 1881-yilda Misr janubidagi Dayr al-Bahoriy hududidan topilgan. U 18-sulolaning ikkinchi firʼavni, giksoslarni quvib qolgan va Misrni birlashtirgan hukmdor Yaxmos I ning oʻgʻli boʻlgan.
Amenxotep I miloddan avvalgi Misrda 1525-1504-yillarda hukmronlik qilgan. Aynan mana shu davr Misr tarixida “Oltin asr” deb yuritadi. Amenxotep I davrida Misrda xotirjamlik va farovonlik hukm surgan, yangi madaniy obyektlar qurilgan. Firʼavn Liviya va shimoliy Sudanga muvaffaqiyatli harbiy yurishlarni amalga oshirgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!