Oʻzbekiston chempionatining joriy mavsumida 12-oʻrinni egallagan “Mashʼal” klubi Pro-ligada 3-oʻrinni band etgan “Olimpik” bilan Superligada qolish uchun kurash olib bordi. Toshkentdagi “Paxtakor” markaziy oʻyingohida kechgan uchrashuvda, Temur Kapadze shogirdlarining qoʻli baland keldi.
Bahsning birinchi boʻlimida jamoalar nisbatan ehtiyotkor oʻyin namoyish etishdi va darvozalarga toʻp kiritilmadi. Ikkinchi boʻlimning 57-daqiqasida esa “Olimpik” darvozasi tomon penalti belgilandi va uni Sirojiddin Qoʻziyev aniq amalga oshirib, hisobni ochdi.
Shundan soʻng, “Olimpik” standart vaziyatdan hisobni tenglashtirdi. Gol boʻlgan mahali “Mashʼal” posboni va himoyachisi xatoga yoʻl qoʻyishdi. Natijada Otabek Joʻraqoʻziyev yaqin masofadan darvozani ishgʻol qildi.
Keyinchalik, bahsdagi ustunlik “Olimpik” tomonga oʻtdi va ular 74 hamda 77-daqiqalarda raqiblar darvozasiga ikkita toʻp kiritib, hisobdagi ustunlikni oʻz tomonlariga ogʻdirishdi. Gollarga Temur Mamasidiqov mualliflik qildi. “Mashʼal” futbolchilari esa raqib darvozasiga boshqa yoʻl topa olishmadi va shu tariqa bir yil avval tashkil etilgan “Olimpik” klubi Superliga yoʻllanmasini qoʻlga kiritdi.
Qayd etish mumkin, Oʻzbekiston chempionatlari tarixida ilk marta quyi liga klubi oʻtish bahsida yuqori divizion klubini magʻlub etib, Superligaga chiqdi. “Mashʼal” esa kelgusi mavsumni Pro ligada boshlaydigan boʻldi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!