Ayni daqiqalarda Prezident Shavkat Mirziyoyev raisligida aholini kasb-hunarga o‘qitish va monomarkazlar faoliyatini takomillashtirish chora-tadbirlari yuzasidan videoselektor yig‘ilishi bo‘lib o‘tmoqda.

Yig‘ilishda kasb-hunar taʼlimini zamon talablariga moslashtirish bo‘yicha yangi tizim joriy qilinishi belgilandi.

Yangi tizimga ko‘ra, 45 ta kollej Bandlik vazirligi tizimiga o‘tkazilib, ularning o‘rnida monomarkazlar tashkil etiladi.

Oliy taʼlim vazirligi barcha kasb-hunar maktablari va texnikumlarni boshqarish va metodik taʼminlashga masʼul bo‘ladi.

Vazirlikda alohida vazir o‘rinbosari lavozimi joriy etilib, departament tashkil qilindi. Bu lavozimga yetarli tajribaga ega bo‘lgan, Buxoro shahar monomarkaz rahbari Sadoqat Siddiqova tayinlandi.

“Bugungi kunda oliy taʼlim tizimidagi katta islohotlar o‘z natijasini berishni boshladi. Joriy yilda 36 ta oliygohga akademik va moliyaviy mustaqillik berildi.

Endi professional taʼlim tizimini tubdan isloh qilish – oliy taʼlim vaziri, uning o‘rinbosarlari, rektorlarning eng ustuvor vazifasi bo‘lishi kerak. Bu juda muhim vazifa, tizimli ish tashkil etilmasa, odamlar rozi bo‘lmaydi”, – dedi Prezident.

Buning uchun Professional taʼlimni rivojlantirish jamg‘armasi tashkil etilib, unga 50 mlrd. so‘m yo‘naltiriladi.

Viloyat, tuman va shaharlarda Kasb-hunar taʼlimi kengashlari tashkil etiladi. 

• Kollej
• Oliy ta'lim
• Tayinlov
• Vazirlik
• Videoselektor