Toshkentdagi teatrlarda joriy yilning 30-noyabridan 7-dekabriga qadar Mustaqil Davlatlar Hamdoʻstligi, Boltiqboʻyi va Gruziya davlatlari IV “Yoshlar teatr sanʼati” forumi oʻtkaziladi. Bu haqda Madaniyat vazirligi maʼlum qilgan.

Qayd etilishicha, ushbu forum ilk bor 2012-yilda Kishinev shahrida (Moldova), 2015-yil Minsk (Belarus)da, uchinchi bor 2018-yil Yerevan shahrida (Armaniston) oʻtkazilgan boʻlsa, bu galgi forumga Oʻzbekiston mezbonlik qilmoqda.

Keltirilishicha, forumda Armaniston, Estoniya, Qozogʻiston, Qirgʻiziston, Gruziya, Ukraina, Rossiya, Moldova, Belarus, Tojikiston, Ozarbayjon kabi davlatlardan tashrif buyurgan qatnashchilar Ekspertlar kengashi tomonidan tanlab olingan spektakli bilan ishtirok etadi.

Har bir sahna asarini turli davlatlardan yigʻilgan Hayʼat aʼzolari baholab boradi.

Shuningdek, forum doirasida “Taʼlim dasturi” amalga oshiriladi. Unda yosh teatr ijodkorlariga oʻz kasbiy tajribalari bilan oʻrtoqlashish imkoni beriladi.

Shu bilan birga, Oʻzbekiston davlat sanʼat va madaniyat instituti teatr yoʻnalishi talabalariga mahorat darslari, seminar-treninglar oʻtkaziladi. Forum ishtirokchilari “Taʼlim dasturi” laboratoriyasida malakali rejissyor, aktyor hamda teatr tanqidchilaridan mahorat darslarini olib, forum davomida yagona spektakl ustida ijod qilishadi. Forum yakunida esa mazkur spektakl tomoshabinlar eʼtiboriga havola etiladi.

• San’at
• Toshkent