O‘zbekiston ta’lim muassasalarida chet tillarini o‘rgatish uchun 15 milliard so‘m ajratiladi. Bu haqida Norma xabar berdi.
Ma’lum bo‘lishicha, Vazirlar Mahkamasining 19-yanvardagi “Chet tillarni o‘rganishni takomillashtirishga doir qo‘shimcha chora-tadbirlar to‘g‘risida”gi qarori qabul qilingan.
Qaror bilan xalq ta’limi sohasidagi islohotlarni qo‘llab-quvvatlash jamg‘armasiga ajratiladigan mablag‘lar hisobidan Chet tillarni o‘rganishni qo‘llab-quvvatlash jamg‘armasiga byudjetdan tashqari 15 milliard so‘m miqdorida bir martalik moddiy yordam ajratilishi nazarda tutilmoqda.
Davlat byudjetidan jamg‘armaga ajratiladigan mablag‘lar quyidagilarga yo‘naltiriladi:
- maktabgacha ta’lim muassasalari, umumta’lim maktablari, akademik litseylar, oliy ta’lim muassasalari va o‘quv markazlarida samarali o‘qitish uslublari, dasturlari va darsliklarini joriy etish;
- xorijiy mamlakatlarda nashr etilgan zamonaviy o‘quv va ilmiy adabiyotlar, darsliklar va o‘quv-metodik qo‘llanmalar, xalqaro test sinovlari va ularni o‘tkazish uchun tegishli ruxsat va litsenziyalar, chet tillarini o‘qitish mazmuniga mualliflik huquqini sotib olish;
- xorijiy tillarni o‘rganishga ko‘maklashish sohasida axborot-kommunikatsiya texnologiyalari, dasturiy loyihalarni ishlab chiqish va amalga oshirish;
- asosiy til ko‘nikmalarini shakllantirish uchun videolar, o‘yinlar, ko‘ngilochar, filmlar va boshqa ta’lim kontentini yaratish;
- fuqarolik-huquqiy shartnomalar asosida yuqori malakali, shu jumladan mahalliy va xorijiy mutaxassislarni jalb etish va boshqalar.
Bundan tashqari, 2022-yil 1-fevraldan kamida C1 yoki undan yuqori darajadagi xalqaro miqyosda tan olingan milliy yoki unga tenglashtirilgan sertifikatga ega hamda rus tilida so‘zlashmaydigan ta’lim muassasalarida (sinflarida) ishlayotgan rus tili o‘qituvchilariga ish haqiga 50 foiz qo‘shimcha to‘lanadi.
Bunda “Test of Russian Foreign Language” (TORFL)ning C1 darajasidagi xalqaro sertifikat, “Rus tilidan chet tili sifatidagi test»dan TRKI3 darajasidagi xalqaro sertifikat, shuningdek, o‘zaro mos keluvchi C1 “tilidan chet tili sifatidagi test” xalqaro sertifikatlari hamda “The Common European Framework of Reference for Languages” C1 darajadagi sertifikat hisobga olinadi.
Ta’kidlanishicha, 2022-yil 1-martdan boshlab malakali mutaxassislarni jalb qilgan holda chet tili o‘qituvchilarining o‘qish, yozish va nutq so‘zlash bo‘yicha kompetensiyalarini rivojlantirish hamda sertifikat olishga qaratilgan malaka oshirish kurslari tashkil etiladi.
Vazirlar Mahkamasi huzuridagi Ta’lim sifatini nazorat qilish davlat inspeksiyasiga 2022-yil 1-mayga qadar xalqaro miqyosda e’tirof etilgan baholash tashkilotlari bilan hamkorlikda chet tillari o‘qituvchilarining tinglash, o‘qish, yozish va so‘zlash bo‘yicha malaka testlarida tinglash, o‘qish, yozish va so‘zlash malakasini baholash tizimini ishlab chiqish topshirilgan.
Hujjat qonun hujjatlari ma’lumotlari milliy bazasida davlat tilida e’lon qilingan va 2022-yil 20-yanvardan kuchga kirgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!