“Xalqaro shartnomani tasdiqlash to‘g‘risida”gi Prezident qarori loyihasiga binoan O‘zbekiston va Belarus hukumatlari o‘rtasida investitsiyalarga oid xalqaro shartnoma tasdiqlanadi.

Qayd etilishicha, mazkur qaror loyihasi bilan 2019-yil 1-avgust kuni Minsk shahrida imzolangan O‘zbekiston Respublikasi Hukumati bilan Belarus Respublikasi Hukumati o‘rtasida Investitsiyalarni o‘zaro rag‘batlantirish va himoya qilish to‘g‘risidagi Bitimni tasdiqlash ko‘zda tutilmoqda.

Shuningdek, qaror loyihasining qabul qilinishi Davlat byudjetidan qo‘shimcha xarajatlarni talab etmasligi maʼlum qilingan.

Qaror loyihasi qabul qilinishi orqali Minsk shahrida imzolangan yuqoridagi hukumatlararo bitimni kuchga kirishi uchun zarur bo‘lgan ichki davlat protseduralari amalga oshiriladi hamda bitimni qo‘llash uchun zamin yaratiladi.

Mazkur xalqaro shartnomani amalga oshirish uchun masʼul bo‘lgan vakolatli organ etib Investitsiyalar va tashqi savdo vazirligi belgilanadi hamda Tashqi ishlar vazirligi O‘zbekiston Respublikasi tomonidan mazkur xalqaro shartnomaning kuchga kirishi uchun zarur bo‘lgan davlat ichki tartib-taomillari bajarilganligi to‘g‘risida Belarus tomoniga tegishli bildirishnoma yuboradi.

• Belarus
• Investitsiya
• O‘zbekiston