Toshkentda Ozarbayjon prezidenti Ilhom Aliyevning O‘zbekistonga tashrifi arafasida ikki davlat rasmiylari hamkorligida O‘zbekiston-Ozarbayjon biznes-forumi bo‘lib o‘tdi.
Tadbirda vazirlik va idoralar, tarmoq birlashmalari rahbarlari hamda Ozarbayjon va O‘zbekistonning yirik kompaniyalarining 100 dan ortiq vakillari ishtirok etdi.
Tadbirni ochar ekan, delegatsiyalar rahbarlari investitsiyalar, sanoat va savdo sohasida erishilgan yutuqlarni taʼkidlab, ikki mamlakat iqtisodiyotlarining ishga solinmagan salohiyati hamda neft-kimyo, kimyo, elektrotexnika, to‘qimachilik, oziq-ovqat, farmatsevtika, zargarlik, avtomobilsozlik va boshqa sohalarda o‘zaro manfaatli hamkorlikni yanada rivojlantirish uchun mavjud shart-sharoitlar qayd etildi.
Shuningdek, ikki mamlakat hududlari orqali o‘zaro va tranzit yuk tashishni ko‘paytirishni rag‘batlantirish bo‘yicha aniq chora-tadbirlar joriy qilinishi eʼlon qilindi. Bu, o‘z navbatida, transport va logistika sohasida O‘zbekiston-Ozarbayjon hamkorligini chuqurlashtiradi.
Uchrashuv yakunida delegatsiyalar rahbarlari o‘zaro manfaatli sheriklikning aniq yo‘nalishlarini ishlab chiqish va qatʼiy kelishuvlarga erishishni nazarda tutgan holda Forum ishtirokchilariga natijador va muvaffaqiyatli ish olib borishni tiladilar.
Tadbir dasturi doirasida “B2B” va “G2B” tarzida ham panel munozaralari bo‘lib o‘tdi, unda o‘zbek va ozarbayjon biznes vakillari aniq loyiha takliflari asosida biznes hamkorlik istiqbollarini batafsil muhokama qilish imkoniyatiga ega bo‘ldilar.
Forum yakunlari bo‘yicha umumiy qiymati 500 million dollardan ortiq qo‘shma loyihalar va savdo shartnomalarini amalga oshirish bo‘yicha qator bitimlar, shuningdek, ikki mamlakatning tegishli vazirlik va idoralari o‘rtasida amaliy hamkorlik to‘g‘risida 10 ta kelishuv imzolandi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!