Hukumat Xalqaro mehnat tashkiloti bilan yaqin hamkorlikni mustahkamlash, xalqaro tashkilotda O‘zbekiston Respublikasining ovoz berish huquqini saqlab qolish, shuningdek, mamlakatning siyosiy imijini yaxshilash maqsadida tashkilotga aʼzolik badallarini to‘lab berish haqidagi qarorni qabul qildi.

Qayd etilishicha, O‘zbekiston hukumatining xalqaro shartnomalar va xalqaro tashkilotlarga aʼzolik bo‘yicha majburiyatlardan kelib chiqadigan badallarni to‘lash bo‘yicha qarzdorligi byudjet mablag‘lari hisobidan alohida qaror asosida so‘ndiriladi.

Shunga muvofiq, Bandlik va mehnat munosabatlari vazirligi hamda Moliya vazirligining Xalqaro mehnat tashkiloti oldida O‘zbekistonning aʼzolik badali to‘lovlari bo‘yicha avvalgi yillarda yuzaga kelgan 747 ming 400 Shveysariya franki miqdoridagi qarzdorlik (taxminan 768 ming AQSh dollari, -tahr.) 2024-yilga qadar bosqichma-bosqich qoplanadi.

Mazkur qarzdorlikning 2022-2024-yillarda Davlat byudjeti mablag‘lari hisobidan bosqichma-bosqich qoplanishi nazarda tutilmoqda.

Shuningdek, 2023-yildan boshlab O‘zbekistonning Xalqaro mehnat tashkiloti oldidagi aʼzolik badalidan qarzdorligini so‘ndirish uchun zarur mablag‘lar Davlat byudjeti parametrlarida nazarda tutib borilishi belgilanmoqda.

Maʼlumot uchun, Xalqaro mehnat tashkilotiga 170 dan ortiq davlat aʼzo bo‘lib, O‘zbekiston 1992-yil tashkilotga aʼzo davlatlar tarkibiga kirgan, tashkilotning 11 ta konvensiyasini ratifikatsiya qilgan.

Bu tashkilot mehnat sharoitlarini muhofaza qilish va yaxshilash, ish bilan to‘liq bandlikni taʼminlash va turmush darajasini ko‘tarish, tadbirkorlar va mehnatkashlar o‘rtasida hamkorlikni rag‘batlantirish choralarini ishlab chiqish uchun hukumatlar, tadbirkorlar va mehnatkashlarni teng huquqlarda birlashtiradi.

• Hukumat
• qiziqarli