Bolalar uchun odil sudlov sohasida faoliyat yuritayotgan milliy mutaxassislar va ekspertlar bugun, 25 avgust kuni “O‘zbekistonda bolalar uchun odil sudlovdan foydalanish imkoniyati: hozirgi holat va istiqbollar” mavzusidagi konferensiyada, O‘zbekistonda odil sudlovga erishishdagi to‘siqlar va imkoniyatlarni muhokama qilib, huquqiy islohotlar bo‘yicha ilg‘or xalqaro tajribalar bilan o‘rtoqlashdi. Bu haqda Oliy sud axborot xizmati xabar berdi.

“Qizlar va o‘g‘il bolalarning odil sudlovdan foydalanish imkoniyatini ta’minlash har bir bolaning huquqlari, jumladan, ta’lim olish, sog‘liqni saqlash, ijtimoiy himoya hamda zo‘ravonlik va shafqatsiz munosabatdan himoya qilish huquqlari buzilgan hollarda adolatli, o‘z vaqtida amalga oshiriladigan samarali himoya vositalaridan foydalanish bo‘yicha qonunlar, tizimlar va amaliyotlar mavjudligini anglatadi”, – dedi UNICEF’ning O‘zbekistondagi vakolatxonasi rahbari Munir Mamedzade.

Uning ta’kidlashicha, adliya va aholini ijtimoiy himoya qilish tizimlarining birgalikdagi sa’y-harakatlari bolaning alohida ehtiyojlari, yoshi, jinsi va qobiliyatini e’tiborga olgan holda uning oliy manfaatlarini ta’minlashga qaratilgan bo‘lishi kerak.

2016-yildan buyon O‘zbekistonda milliy qonunchilik va huquqni qo‘llash amaliyotini xalqaro standartlarga muvofiqlashtirishga, qonun ustuvorligi bo‘yicha ilg‘or xalqaro tajribani joriy etishga qaratilgan huquqiy va sud-huquq islohotlarining yangi bosqichi davom etmoqda. Islohotlar davomida qonunchilikka bir qator muhim o‘zgarishlar kiritilgan bo‘lsa-da, bolalarning odil sudlovdan foydalanish imkoniyatini ta’minlash O‘zbekistonning huquqiy va qonun ustuvorligi islohotlari kun tartibida alohida ustuvor yo‘nalish sifatida belgilanmagan.

Bola huquqlari bo‘yicha vakil Aliya Yunusova esa bolalar uchun odil sudlovdan foydalanish faqatgina odil sudlovni va ma’muriy tizimlarni mustahkamlashdan iborat emasligi, bu turli davlat organlarining yaqin o‘zaro hamkorligi ekanini aytib o‘tdi. Uning fikricha, bolalar uchun odil sudlov birinchi navbatda ozodlikdan mahrum qilish bilan bog‘liq bo‘lmagan jazolarning mavjudligini va ozodlikdan mahrum qilish faqatgina so‘nggi chora sifatida ko‘rilishini nazarda tutadi.

Konferensiyada Oliy Majlis Senati a’zolari va Qonunchilik palatasi deputatlari, mas’ul davlat idoralari vakillari, soha mutaxassislari, fuqarolik jamiyati faollari, akademiklar, xalqaro ekspertlar, BMT va boshqa xalqaro tashkilotlarning O‘zbekistonda faoliyat yuritayotgan vakillari ham ishtirok etdi.

Shuningdek, “Adolat” milliy huquqiy axborot markazi bo‘lim boshlig‘i Muzaffar Ahmedov voyaga yetmagan shaxslarning huquqiy ongi va huquqiy madaniyatni oshirish: natija va muammolar mavzusida ma’ruzasi tinglandi. Ahmedov o‘z ma’ruzasida hozirda Qonunchilik ma’lumotlari milliy bazasida mavjud bo‘lgan 112 mingdan ortiq hujjatning 33 mingdan ortig‘ini voyaga yetmaganlarga oid qonunchilik hujjatlari tashkil etishini, mazkur raqamlarning o‘zi ham mamlakatimiz kelajagi bo‘lgan voyaga yetmaganlarning huquqiy ong va huquqiy madaniyatini oshirish naqadar hayotiy muhim masala ekanligini ko‘rsatishini ta’kidladi.

• Bolalar
• Oliy sud
• Sud