Oliy, o‘rta maxsus va professional ta’lim muassasalarida ta’lim oluvchilarning har yilgi qishki ta’tili muddati o‘zgarishi mumkin.

Bu borada Prezidentning tegishli qarori loyihasi e’lon qilindi.

Mazkur hujjat loyihasi bilan dekabr oyining oxirgi o‘n kunligi va yanvar oyining birinchi o‘n kunligi oralig‘ida O‘zbekiston Respublikasi professsional ta’lim muassasalari o‘quvchilari va oliy ta’lim muassasalari talabalarining har yilgi ikki haftalik qishki ta’tilini o‘tkazish bo‘yicha bildirilgan taklif ma’qullanadi.

Belgilanishicha, ta’lim sohasidagi vakolatli davlat boshqaruvi organlari mavjud sharoitdan kelib chiqib o‘quvchi va talabalarga ta’til berish muddatini o‘zgartirish huquqiga ega bo‘ladi.

Shuningdek, Transport vazirligi, “O‘zbekiston temir yo‘llari” AJ va “Uzbekistan airways” AJ ta’lim sohasidagi vakolatli davlat boshqaruvi organlarining qishki ta’tilni e’lon qilish haqidagi buyruqlari va buyurtmanomalari asosida qishki ta’til boshlanishidan 10 kun avvaldan boshlab chiptaning to‘liq qiymatidan 50 foizli chegirma to‘lovi asosida respublika ichida harakatlanuvchi tezyurar va yo‘lovchi (yuqori tezlikda harakatlanuvchi poyezdlar va barcha yo‘lovchi poyezdlarning SV, VIP vagonlari bundan mustasno) poyezdlariga hamda mahalliy aviareyslarga chiptalar sotuvini tashkil etadi.

O‘quvchi va talabalarning yo‘nalishli shaharlararo avtobus qatnovi orqali harakatlanishi uchun ham imtiyozli chiptalar taqdim etish mexanizmi joriy etiladi.

ma’lumot uchun, mazkur tartib oliy, o‘rta maxsus va professional ta’lim muassasalarida ta’lim oluvchilarning qishki ta’til vaqtida o‘zlari doimiy ravishda istiqomat qilayotgan joylarga o‘z vaqtida va xavfsiz yetib borishlarini tashkillashtirish, ularning qishki ta’til vaqtini samarali va mazmunli o‘tkazishini ta’minlash maqsadida amaliyotga tatbiq etilmoqda.

• OTM
• Ta'til
• Talabalar
• Texnikum