Vazirlar Mahkamasining “2022–2023-yillarda O‘zbekiston Respublikasida yoshlarga oid davlat siyosatini amalga oshirish dasturini tasdiqlash to‘g‘risida”gi qarori qabul qilindi. Bu haqda Norma xabar berdi. 

Prezidentning 2021-yil 13-iyuldagi PF-6260-son farmoniga muvofiq yoshlar tomonidan ko‘tarilgan taklif va tashabbuslar, muammo hamda masalalar yechimi yuzasidan har yili “Yoshlar kuni” arafasida hukumatning dasturi, shuningdek, Qoraqalpog‘iston Vazirlar Kengashi, viloyatlar va Toshkent shahar, tuman va shahar hokimliklarining alohida hududiy dasturlari qabul qilinadi.

Mazkur dasturlar yoshlarning bilim va kasb-hunar egallashi, ular uchun munosib ish va turmush sharoitini yaratish, bo‘sh vaqtini mazmunli tashkil etishga qaratilgan kompleks chora-tadbirlardan iborat bo‘ladi.

Hujjat bilan Yoshlar ishlari agentligi tomonidan Qoraqalpog‘iston Vazirlar Kengashi, viloyatlar va Toshkent shahar hokimliklari bilan birgalikda ishlab chiqilgan 2022–2023-yillarda O‘zbekistonda yoshlarga oid davlat siyosatini amalga oshirish dasturi tasdiqlangan. 

U quyidagilarni o‘z ichiga oladi:

• “yoshlar daftari”ga kiritilgan yoshlar bilan ishlash, jumladan, yoshlarni har tomonlama qo‘llab-quvvatlash, ularning bandligiga ko‘maklashish hamda ijtimoiy faolligini yanada oshirishga oid qo‘shimcha chora-tadbirlarni amalga oshirish;
• “yoshlarning bo‘sh vaqti – yetakchining ish vaqti” tamoyili asosida tashabbus olimpiadasini o‘tkazish, yoshlar bilan “mahallabay” ishlash tizimini joriy etish;
• ko‘chama-ko‘cha tadbir va loyihalar, tanlovlar, musobaqalar hamda to‘garaklarni tizimli ravishda tashkil etish;
• yoshlar o‘rtasida huquqbuzarlik va jinoyatlar sodir etilishining oldini olish, joylarda ijtimoiy-ma’naviy muhit barqarorligi va tarbiyaviy ishlar samaradorligini oshirish;
• yoshlar infratuzilmalarini rivojlantirish, xalqaro hamkorlikni rivojlantirish, millatlararo totuvlikni yanada mustahkamlash, yoshlar siyosatini amalga oshirishda OAVning rolini kuchaytirish chora-tadbirlarini belgilash.
•  

Hujjat qonun hujjatlari ma’lumotlari milliy bazasida e’lon qilingan va 8-iyundan kuchga kirgan.

• Qaror
• Vazirlar Mahkamasi
• Yoshlar