2022-yil boshida Rossiya va Ukraina rahbariyati o‘rtasida vositachi bo‘lgan Isroilning sobiq bosh vaziri Naftali Bennet ikki tomon bilan aloqalari haqidagi xotiralari bilan o‘rtoqlashdi. Kecha, 4-fevral oqshomida chop etilgan intervyusida u, boshqa narsalar qatori, Rossiya yetakchisi Vladimir Putin Ukrainadagi maxsus operatsiya boshlanishida uni Ukraina prezidenti Vladimir Zelenskiyga jismoniy zarar yetkazish xavfi yo‘qligiga ishontirganini da’vo qildi.

Bu Bennettning 2022-yil yozida siyosatdan ketganidan keyingi birinchi intervyusi. Qariyb besh soatlik suhbat davomida u Ukraina mavzusiga to‘xtalib o‘tgan. 2022-yil 5-mart kuni Moskvaga safari va Kremlda Putin bilan uchrashganini eslab, Bennet oʻsha paytda Zelenskiyning taqdirini muhokama qilganini daʼvo qildi.

"Men Zelenskiy tahdid ostida ekanini bilardim. U hech kim bilmagan qandaydir bunkerda yashiringan edi. Uchrashuvdan 3-4 soat o‘tgach men Putindan Zelenskiyni o‘ldirmoqchimisiz deb so‘radim. U “Men Zelenskiyni o‘ldirmayman” deb javob berdi. Keyin men bunga ishonch hosil qilmoqchiman, siz menga Zelenskiyni o'ldirmaslikga so'z bering dedim. U ya’na "Men Zelenskiyni o‘ldirmayman", deb javob berdi”, deya Bennet Putin bilan suhbat mazmuni haqidagi o‘z versiyasini aytdi.

Bennetning taʼkidlashicha, Kremldagi uchrashuvdan keyin sobiq bosh vazir aeroportga ketayotib, Zelenskiyga qo‘ng‘iroq qilib, xavf ostida emasligiga ishontirgan. Shundan soʻng, Ukraina prezidenti “oʻz kabinetiga qaytib kelgan va u yerdan video yozib olib hech narsadan qoʻrqmasligini aytgan.

Isroillik siyosatchiga ko‘ra, o‘shanda Rossiya rahbari katta yon bosgan.

"O'sha shanba kuni Zelenskiy ham juda katta yon bosdi. Zelenskiy NATOga kirishdan bosh tortdi. Bu har ikki tomonning katta imtiyozlari edi”, dedi sobiq bosh vazir.

Bennet, shuningdek, Ukraina prezidenti maxsus operatsiya boshlanganidan keyin Rossiya rahbariyatiga murojaat qilishni so‘raganini, o‘z navbatida bu “yordam so‘rovi” ekanini ta’kidladi.

"Zelenskiy menga qo'ng'iroq qilib, Putin bilan bog'lanishimni so'radi. Menda hamma narsa yozib olingan. Uning uchun bu juda qiyin edi. Unutmang, o‘shanda u kunlari sanoqli ekaniga, uni yo‘q qilishlariga amin edi”, — dedi sobiq hukumat rahbari.

Shu bilan birga, u AQSh, Buyuk Britaniya, Germaniya va Fransiya rahbarlari bilan “barcha harakatlarini to‘liq muvofiqlashtirganini” qo‘shimcha qildi.

• Isroil
• Putin
• Rossiya
• Ukraina
• Zelenskiy