Bugun, 12-mart kuni soat 7:30 larda A-373 “Toshkent-O‘sh” avtomobil yo‘lining 229,8 km hududida, avtomobil yo‘lidan 80-100 metr uzoqlikda tog‘ yonbag‘irliklaridan 300 ming m.kub hajmda qor ko‘chkisi sodir bo‘lib, qor massalari “Qamchiqsoy” soyi o‘zaniga tushgan.
Shuningdek, “Toshkent-Vodiy” avtomobil yo‘lining 6 ta joyida tosh-tuproq massasi o‘pirilishi sodir bo‘lib, yo‘l chetdagi handaqqa (kyuvetga) tushgan. Bu haqda FVV Matbuot xizmati maʼlum qildi.
Xabarda aytilishicha, bundan tashqari nomustahkam tosh massalari avtomobil yo‘lining 251,7 km, 260 km oraliqlarida avtomobil yo‘liga tushishi mumkin bo‘lgan hududlar aniqlangan.
Hozirda xavfli xududlarda tosh massalarini majburiy tushirish bo‘yicha “Qamchiq” Maxsus qidiruv, yong‘in-qutqaruv boshqarmasi, “Qamchiqavtoyo‘l” hamda Yo‘l-harakati xavfsizligi xodimlari bilan hamkorlikda tadbirlar amalga oshirilmoqda.
Dovon yo‘lida sodir bo‘lgan geologik va gidrometeorologik xodisalar natijasida jabrlangan va jarohat olganlar yo‘q.
FVV, shuningdek, “Qamchiq” dovoni yo‘li yopilishi munosabati bilan Angren shahrida joylashgan “Angrenlend” oshxonasida shtab ish faoliyatini boshlaganini maʼlum qildi.
Qayd etilishicha, yo‘lda qolib ketgan avtotransport haydovchilari va yo‘lovchilarni Toshkent viloyatining Ohangaron va Angren shaharlari hamda Namangan viloyatining Pop tumanidagi mavjud umumovqatlanish shohobchalariga joylashtirish ishlari amalga oshirilgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!