Rossiya TIV Qozog‘istondagi vaziyat yuzasidan rasmiy munosabatini e’lon qildi. Unga ko‘ra, rasmiy Kreml Qozog‘istondagi vaziyat o‘zaro muloqot orqali tez orada normallashishiga ishonadi.

“Qardosh qo‘shni davlatdagi voqealarni diqqat bilan kuzatib boramiz.

Biz barcha muammolarni ko‘cha tartibsizliklari, qonunlarni buzish bilan emas, balki konstitusiyaviy-huquqiy maydon va muloqot doirasida tinch yo‘l bilan hal etish tarafdorimiz. Qozog‘iston prezidenti Qosim-Jomart Toqayevning ayni paytdagi qadamlari vaziyatni barqarorlashtirish, mavjud muammolarni, jumladan, namoyishchilarning qonuniy talablarida mavjud muammolarni zudlik bilan hal qilishga qaratilgan”, – deyiladi Rossiya TIV munosabatida.

Rasmiy munosabatda mamlakatdagi vaziyat tezroq normallashishiga umid qilingan. Shu bilan birga Qozog‘iston hududidagi Rossiya vakolatxonalari bilan aloqda bo‘lib turilishi aytilgan.

“Biz Rossiyaning Qozog‘istondagi vakolatxonalari bilan aloqada bo‘lib turamiz. Diplomatik va konsullik vakolatxonalarimiz atrofidagi muhit tinchligicha qolmoqda. Hozirda mavjud ma’lumotlarga ko‘ra, Qozog‘iston Respublikasida bo‘lgan Rossiya Federasiyasi fuqarolari orasida qurbonlar yo‘q.

Biz voqealar rivojini diqqat bilan kuzatishda davom etamiz”, – deyiladi Rossiya TIV munosabatida.

• Namoyish
• Qozog‘iston
• Rossiya
• TIV