Tojikiston va Qirg‘iziston chegarachilari o‘rtasidagi otishma chog‘ida tojikistonlik harbiy xizmatchi halok bo‘ldi, uch nafari yaralandi. Bu haqda Asia-Plus nashrining Telegram kanalida xabar berildi.

Qayd etilishicha, bugun, 14-iyun kuni ertalab Isfara shahrining Vorus jamoati markazidan 10 km masofada joylashgan Ko‘h qishlog‘ida Tojikiston va Qirg‘iziston chegarachilari o‘rtasida otishma boshlangan.

“Otishma davom etmoqda, … o‘lgan odam – muddatli harbiy xizmatchi. Hozirda shifoxona yaradorlarni qabul qilishga tayyorgarlik ko‘rmoqda”, - deyiladi xabarda.

Ichki ishlar boshqarmasining aniqlik kiritishicha, hozirda muzokaralar olib borilmoqda. Tojikistondan ularda chegara qo‘shinlari qo‘mondoni Rajabali Rahmonali va So‘g‘d viloyati rahbari Rajabboy Ahmadzoda ishtirok etmoqda.

Qirgʻiziston chegara xizmati matbuot markazining maʼlum qilishicha, chegaradagi otishma Tojikiston hududidan Qirgʻizistonning Buloq-Bashi chegara posti yoʻnalishida otilgan oʻqdan kelib chiqqan. Bunga javoban qirg‘iz chegarachilari Tojikiston postiga qarata o‘q uzgan.

• Harbiy
• Otishma
• Qirg‘iziston
• Qurbon
• Tojikiston