Qoraqalpog‘istonda bo‘lib o‘tgan voqealar bo‘yicha sud jarayonlari 28 noyabr kuni boshlanadi. Bu haqda mustaqil tekshiruv o‘tkazish bo‘yicha komissiya ma’lum qildi.
Qayd etish mumkin, 2022-yil 16-iyul kunidan Qoraqalpog‘iston Respublikasida yuz bergan holat va voqealarni o‘rganish hamda ular yuzasidan mustaqil tekshiruv o‘tkazish bo‘yicha komissiya o‘z ishini boshlagan edi.
Komissiya inson huquq va erkinliklarini ta’minlash, voqealarni har tomonlama va holis o‘rganish, shuningdek, olingan axborotlarni qayta tekshirish hamda o‘z faoliyatini jamoatchilik fikrini inobatga olgan holda tashkil qilishni asosiy vazifasi sifatida belgilagan.
Dastlab, aholi fikrini o‘rganish maqsadida fuqarolarga 1374 qisqa raqamli call-markazi va to‘g‘ridan-to‘g‘ri Komissiya shtabiga kelib murojaat qilish imkoniyati yaratilgan bo‘lsa, keyinchalik “@independetuz_bot” telegram kanali ishga tushirilib, murojaatlar elektron tarzda ham qabul qilingan.
Fuqarolar murojaatlari bilan ishlash bilan birga Qoraqalpog‘iston Respublikasida yuz bergan holat va voqealar joyiga chiqib o‘rganilib, tegishli ma’lumotlar olingan va ular tahlil qilingan. Xususan, bir qator davlat organlari va idoralariga, ijtimoiy ob’yektlarga, xususan Qoraqalpog‘iston Respublikasi Jo‘qorg‘i Kengesi, Ko‘p tarmoqli tibbiyot markazi, harbiy va ichki ishlar gospitallari, huquqni muhofaza qiluvchi organlarga, ya’ni Milliy gvardiya, Nukus shahar Ichki ishlar bo‘limi, Nukus shahridagi Shimoliy-g‘arbiy harbiy okrug, Nukus xalqaro aeroportiga tashrif buyurilgan.
Qolaversa, Komissiya fuqarolar tomonidan kelib tushayotgan ko‘plab murojaatlardan kelib chiqqan holda Qoraqalpog‘istonda ro‘y bergan voqealarda asosiy gumonlanayotgan va hozirda tergov jarayonida bo‘lib turganlar bilan yakka tartibda suhbatlar olib bordi. Bunda sodir etgan qilmishiga pushaymon va ijtimoiy sharoiti og‘ir bo‘lgan ayblanuvchilarning ro‘yxatlari shakllantirilib, ularni oilasiga qaytarish bo‘yicha tegishli choralar ko‘rilgan.
Shu kunga qadar Komissiya a’zolari taklifi va Qoraqalpog‘iston Respublikasi Jo‘qorg‘i Kengesi iltimosnomasiga ko‘ra, Bosh prokuratura tomonidan 107 nafar ayblanuvchi jamoat kafilligi va qamoq ehtiyot chorasi insonparvarlik tamoyili asosida uy qamog‘i tarzidagi ehtiyot chorasiga almashtirilishi orqali o‘z oilasiga qaytarilgan.
“Tergov jarayonlari davomida ayblanuvchilarning saqlash sharoitlari, qiynoqqa solmaslik, advokat bilan ta’minlanganlik kabi masalalar Mustaqil komissiyaning doimiy nazoratida bo‘ldi. Komissiya a’zolari sud jarayonlarida ham kuzatuvchi sifatida ishtirok etishadi”, – deyiladi xabarda.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!