Qozog‘iston Respublikasining Jambul oblasti Jambul rayonida O‘zbekiston fuqarolari bo‘lgan avtobus YTHga  uchradi.

Qozog‘iston FVVdan olingan maʼlumotga ko‘ra, bugun, 15-iyun kuni Qozog‘iston vaqti bilan soat 03:10 da Jambul oblasti Jambul rayonidan o‘tuvchi “Almata-Toshkent” avtomobil yo‘lining 545 km. da “Qizil tan” qishlog‘idan 7 km uzoqlikda trikotaj mahsulotlari ortilgan yuk mashinasining yonishi oqibatida, avtomobil yo‘lida tirbandlik yuzaga kelganligi natijasida soat 03:40 larda “Almata-Toshkent” yo‘nalishida harakatlanayotgan yuk mashinasi 2 ta yo‘lovchi tashish avtobusi va 1 ta yengil avtomobil bilan to‘qnashuv sodir etgan.

To‘qnashuv oqibatida ushbu avtotransport vositalarida yong‘in kelib chiqqan.

Yong‘in sodir bo‘lgan avtobuslarning birida 31 nafar O‘zbekiston fuqarolari bo‘lgan va ulardan 3 nafari o‘rta darajada tan jarohati bilan Taraz shahar tibbiyot maskaniga olib borilgan. Hozirda ushbu fuqarolarga malakali tibbiy yordam ko‘rsatilmoqda.

Taʼkidlanishicha, Qozog‘iston masʼullari yuzaga kelgan mazkur baxtsiz hodisa oqibatlarini zudlik bilan bartaraf etish, jarohatlanganlarga tez tibbiy yordam ko‘rsatishda o‘zbekistondik hamkasblariga yaqindan ko‘mak berishmoqda.

“Holat yuzasidan Qozog‘iston Respublikasi Favqulodda vaziyatlar vazirligi bilan maʼlumot almashinuvi davom etmoqda”, – deyiladi O‘zbekiston FVV xabarida.

• Avtobus
• FVV
• Qozog‘iston
• YTH