Qozog‘istondagi tartibsizliklardan so‘ng yetkazilgan zararning umumiy miqdori taxminiy hisob-kitob qilindi.
“Atameken” Milliy tadbirkorlar palatasi Qozog‘istonning barcha hududlaridagi xo‘jalik birlashmalari bilan birgalikda tadbirkorlardan noqonuniy xatti-harakatlar natijasida yetkazilgan zararning taxminiy miqdori haqida ma’lumot yig‘ayotganini ma’lum qildi.
Ayni paytgacha yig‘ilgan ma’lumotlarga ko‘ra, 6-yanvar kuni soat 17:00 holatiga jami 43ta obyektda joylashgan 300ta tadbirkorlik subyekti zarar ko‘rgan (jumladan, 12ta savdo uylari va ko‘ngilochar markazlar).
Tartibsizliklarda, asosan, savdo, umumiy ovqatlanish, transport, xizmat ko‘rsatish sohalari, shuningdek, moliya sektorlari (xususan, bankomatlar)ga zarar yetkazilgan. Shuningdek, “KORAMSAK” uyushmasi ma’lumotlariga ko‘ra, Olmaotada 6 ta qurol do‘koni talon-taroj qilingan (“Korgan-Syentr” MCHJ, “Arma-56” MCHJ, “Anna-16” MCHJ, “Anna” MCHJ, “Orujeynik” MCHJ, “Pro-Hunt”).
Milliy tadbirkorlar palatasi ma’lumotiga ko‘ra, yetkazilgan zararning umumiy miqdori taxminan 40 milliard tenge (taxminan 91 million AQSh dollari)ni tashkil etgan (Olmaota shahrining o‘zida 39,5 milliard tenge).
Palata, shu bilan birga, ijarachilarning ko‘pchiligiga yetkazilgan zararni baholash mumkin emasligini, chunki bu obyektlarga kirish imkoni yo‘qligini ma’lum qildi.
Zararning moddiy xususiyati, asosan, binolarga zarar yetkazish, qimmatbaho buyumlar va inventarlarning o‘g‘irlanishi bilan bog‘liqligi qayd etildi.
Eslatib o‘tamiz, Qozog‘istonda so‘nggi 3 kundan buyon kuzatilayotgan ommaviy tartibsizlik aholining tinch namoyishlari bilan boshlanib, ayni paytda jinoyatchi to‘dalarning bosqin, o‘g‘rilik va marodyorliklari bilan davom etmoqda.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!