Qozogʻistonlik jangchi oʻz uyidan kaltaklangan holda olib chiqib ketildi. Bu haqda uning opasi xabar bergan.

“Iltimos yordam bering. Hozirgina ukam, sportchi Kuat Xamitovni uydan olib ketishdi. Oʻn nafar politsiyachi uni kaltaklab, qoʻl-oyogʻi bogʻliq holda olib chiqib ketdi”, — deb yozgan sportchining opasi.

Avvalroq, Kuat Xamitov Qozogʻistonda boʻlayotgan voqealar yuzasidan oʻz pozitsiyasini ochiq bildirgan edi.

“Men doim xalq bilanman! Janaoʻzen va Oqtau aholisiga aytaman, biz doim sizlar bilanmiz. Menimcha, gaz uchun qilingan narxlar notoʻgʻri.

Chunki bu xalqning choʻntagiga tegadi, ahvol unchalik yaxshi emas. Shuning uchun bu nafaqat gazga, oziq-ovqat narxiga, benzinga taalluqlidir, hamma narsa qimmatlashmoqda.

Davlat bu muammoni oʻz qoʻliga olishi, xalqning dardini eshitishi kerak. Shuning uchun, Janaoʻzen aholisi, biz siz bilanmiz, olgʻa!”, – degan Xamitov oʻzining Instagram sahifasida.

Eslatib oʻtish mumkin, Qozogʻistondagi norozilik namoyishlari 2-yanvar kuni Janaoʻzen shahrida (Mangʻistau viloyatidagi shahar, mamlakat gʻarbida) suyultirilgan gaz narxining keskin oshishiga qarshi mitinglar bilan boshlangan edi.

Soʻngra, bu miting iqtisodiy va siyosiy talablar bilan butun mamlakat boʻylab ommaviy norozilik namoyishlariga aylanib ketdi.

• MMA
• Qozog‘iston