Rossiya Federatsiyasi bosh vaziri Mixail Mishustin Federal monopoliya xizmatiga koronavirus uchun PCR testlarining narxlari va uning tarkibini tekshirish uchun buyruq berdi, deya xabar beradi mamlakat Vazirlar Mahkamasi.

Uning so‘zlariga ko‘ra, Federal monopoliya xizmati ushbu tadqiqot ishini joriy yil fevral oyigacha yakunlashi lozim.

Shuningdek, Rossiya hukumati omikron shtammining tarqalishiga qarshi kurashish va koronavirus bilan kasallanganlarga yordam berish uchun sog‘liqni saqlash vazirligiga qo‘shimcha chora-tadbirlar rejasini amalga oshirishni topshirgan. Bir qator topshiriqlarni nazorat qilish hududiy rahbarlar zimmasiga yuklatildi.

Bundan tashqari, mamlakatda PCR testining QR kodlari to‘g‘risidagi qonun loyihasi jamoatchilik uchun salbiy ta’sir ko‘rsatmoqda. Xususan, QR kodli sertifikatning amal qilish muddati 72 soatdan 48 soatgacha qisqartirilishi to‘g‘risida qaror qabul qilingan. Bu esa mamlakatda omikron shtammining keng tarqalishiga sabab bo‘lgan.

Ma’lumotlarga ko‘ra, koronavirusni aniqlovchi testlarning sotuvdagi qiymati 120-150 rublni tashkil qiladi. Duma sog‘liqni saqlash qo‘mitasi raisining o‘rinbosari LDPR a’zosi Sergey Leonov hukumatga testlarning narxini ming rublga oshirishni taklif qilgan.

Aytish joizki, oxirgi sutka davomida Rossiyada COVID-19 bilan kasallanganlar soni 9136 nafarga yetdi. Shu bilan birga, infeksiyaning aniqlangan holatlari soni pandemiyaning butun davri uchun maksimal yangilangan – 49 513. Avvalgi rekord 6-noyabrda o‘rnatilgan edi – o‘shanda 41 335 nafar kasallanganlar qayd etilgan edi.

• Rossiya
• koronavirus