Janubiy Koreyaning Samsung korporatsiyasi o‘zining barcha mahsulotlarini Rossiyaga eksport qilishni vaqtincha to‘xtatdi, deya xabar bermoqda “Reuters” axborot agentligi.

Ma’lum bo‘lishicha, kompaniyaning bu qarorga kelishi Rossiya kuchlari Ukrainaning janubi-sharqiy qismidagi atom elektr stansiyasiga hujum qilganidan keyin keskinlashgan. 

“Hozirgi geosiyosiy o‘zgarishlar tufayli Rossiyaga jo‘natmalar to‘xtatildi. Bizning ustuvor vazifamiz barcha xodimlarimiz va ularning oilalarini himoya qilish. Shu boisdan, atrofda bo‘layotgan voqealarni faol kuzatishda davom etamiz”, deyiladi Samsung kompaniyasining umumiy PR elektron pochta manzili orqali ismini oshkor etmagan Samsung vakilining bayonotida. 

Samsung Rossiyada smartfonlar bozor ulushining 30% dan biroz ortig‘ini egallagan. Shuningdek, Rossiyada smartfonlar savdosi kompaniyaning qurilmalardan olgan global daromadining taxminan 4 foizini tashkil qiladi. Samsung kompaniyasi Rossiyaning Kaluga shahrida televizor ishlab chiqarish zavodiga ham ega. 

Ma’lumot o‘rnida, Samsung’dan oldin Apple, Microsoft, Google, Intel va AMD kompaniyalari ham o‘z mahsulotlari va xizmatlarini Rossiyaga yetkazishni to‘xtatgan edi.

• Eksport
• Koreya
• Rossiya
• Samsung