OAVda Saudiya Arabistoni Podshohligi (SAP) hukumati 2022 yilgi Haj mavsumiga ruxsat bergani haqida ma’lumot tarqatilmoqda. Ushbu xabarlar yuzasidan O‘zbekiston musulmonlar idorasi bayonot berdi.

“Albatta, bunday xushxabar barcha mo‘min-musulmonlarni xursand qiladi. Chunki pandemiya sabab o‘tgan ikki yilda dunyo musulmonlari ushbu farz amalni ado etolmagan edi. Kuni kecha SAP Haj va umra vazirligi “Haj-2022” mavsumi bo‘yicha yakuniy qaror qabul qilingani haqida rasmiy bayonot berdi. 

Bayonotga ko‘ra, pandemiya hamon davom etayotganini hisobga olib, haj tadbiriga chet ellik va mahalliy hojilarga jami 1 million kishi uchun haj ibodatini amalga oshirishga ruxsat beriladi”, – deyiladi xabarda.

Qayd etilishicha, “Haj-2022” mavsumida ishtirok etishi mumkin bo‘lgan yosh chegarasi 65 yoshgacha etib belgilangan.

Yana bir tartib emlanganlik to‘g‘risida bo‘lib, unga ko‘ra, barcha hojilar SAP Sog‘liqni saqlash vazirligi tomonidan ro‘yxatdan o‘tgan va Jahon sog‘liqni saqlash tashkilotida tasdiqlangan Pfizer/BioNTech (AQSH-Xitoy), Oxford-AstraZeneca (Buyuk Britaniya-Shvesiya), Moderna (AQSH) va Johnson & Johnson (AQSH) vaksinalarining 2 dozasini qabul qilgan bo‘lishi zarur.

Xorijiy ziyoratchilar esa SAPga kirishdan 72 soat oldin koronavirus diagnostikasi haqida salbiy natijali PZR ma’lumotnomasini taqdim etishi lozim.

Shuningdek, SAP Haj va umra vazirligi hojilarning ibodat amallarini bajarish davomida o‘z sog‘liqlarini saqlash uchun ehtiyotkorlik shartlari va qoidalariga to‘liq amal qilishlari zarurligini kat’iy talab qilmoqda.

Mazkur masala “Haj” va “Umra” tadbirlarini tashkil etish va o‘tkazish masalalari bo‘yicha Jamoatchilik Kengashi hamda O‘zbekiston Respublikasining Jidda shahridagi Bosh konsulligi “Haj” va “Umra” masalalari bo‘yicha attashesi bilan hamkorlikda muvofiqlashtirilmoqda.

O‘zbekiston musulmonlari idorasi joriy yilgi haj mavsumiga oid rasmiy ma’lumot va yangiliklarni keng jamoatchilikka muntazam berib borilishini ma’lum qiladi.

• Haj
• O‘zbekiston
• Saudiya Arabistoni
• Umra