Senatning o‘ttiz ikkinchi yalpi majlisida O‘zbekiston Respublikasi Oliy Majlisi Senati Raisi o‘rinbosarini saylash masalasi ko‘rib chiqildi. Bu haqda tashkilot axborot xizmati xabar berdi.

Unda “O‘zbekiston Respublikasi Oliy Majlisining Senati to‘g‘risida”gi Konstitusiyaviy Qonunning 9 va 15-moddalariga hamda “O‘zbekiston Respublikasi Oliy Majlisi Qonunchilik palatasi deputatining va Senati a’zosining maqomi to‘g‘risida”gi Qonunning 4-moddasiga muvofiq Murat Kallibekovich Kamalov Oliy Majlis Senati Raisining o‘rinbosari lavozimidan ozod etildi.

Qoraqalpog‘iston Respublikasi Jo‘qorg‘i Kengesi raisi Amanbay Tleubayevich Orinbayev Oliy Majlis Senati Raisining o‘rinbosari etib saylandi.

Bu borada Senatning tegishli qarori qabul qilindi.

Avvalroq, Qoraqalpog‘iston Respublikasi Jo‘qorg‘i Kengesida Qoraqalpog‘iston Respublikasida bo‘shab qolgan o‘ringa O‘zbekiston Respublikasi Oliy Majlisi Senati a’zoligi uchun saylov o‘tkazilgan edi.

To‘g‘ridan to‘g‘ri, teng va yashirin ovoz berish yo‘li bilan amalga oshirilgan saylov natijalariga ko‘ra, Qoraqalpog‘iston Respublikasi Jo‘qorg‘i Kengesi Raisi Amanbay Orinbayev O‘zbekiston Respublikasi Oliy Majlisi Senati a’zoligiga saylangandi.

• Oliy Majlis
• Senat