“Zenit” hujumchisi Serdar Azmun kelasi mavsumdan Germaniyaning “Bayer” jamoasida oʻynaydi. Bu haqda Leverkuzen klubi matbuot xizmati xabar berdi.

Rossiya klubi bilan shartnomasi 2022-yilning yozida tugaydigan 27 yoshli futbolchi “Bayer” bilan 2027-yilgacha shartnoma imzoladi.

Avvalroq Leverkuzen klubi 27 yoshli eronlik futbolchining qishki transfer oynasida oʻtishga tayyorligi haqida xabar berilgandi. Biroq Azmunning nemis klubiga hozir yoki yozda, amaldagi shartnomasi tugashi bilan oʻtishini “Zenit” hal qiladi.

Maʼlumot uchun, joriy mavsumda eronlik futbolchi barcha musobaqalarda 21 ta uchrashuvda 10 ta gol urdi va 4 ta golli uzatmani amalga oshirdi.

Qayd etish mumkin, 2019-yil yanvaridan beri Sankt-Peterburgning “Zenit” klubida toʻp tepib kelayotgan hujumchining transfer qiymati 25 million yevroga baholangan.

• Futbol
• Xorij