Joriy yilning 25-noyabr kuni Seul shahrida savdo-iqtisodiy hamkorlik boʻyicha Oʻzbekiston-Koreya Hukumatlararo qoʻmitasi (HQ)ning 11-yigʻilishi boʻlib oʻtdi. Bu haqda Investitsiyalar va tashqi savdo vazirligi xabar berdi. Tadbirga Oʻzbekiston Respublikasi Bosh vazirining oʻrinbosari – investitsiyalar va tashqi savdo vaziri S.Umurzakov hamda Koreya Respublikasi savdo, sanoat va energetika vaziri Mun Sun Uk hamraislik qildi.
Yigʻilishda ikki mamlakatning asosiy vazirliklari, idoralari, tegishli agentliklari va tarmoq birlashmalari rahbarlari ishtirok etdi.
Qayd etilishicha, yigʻilish davomida investitsiyalar, savdo, sanoat, qishloq xoʻjaligi, infratuzilmani rivojlantirish, energetika, axborot-kommunikatsiya sohasi va sogʻliqni saqlash yoʻnalishlarida ikki tomonlama hamkorlik masalalari muhokama qilingan.
Konstruktiv muloqot kun tartibining asosiy bandlari yuzasidan fikr almashish imkonini berdi. Har ikki tomonning koʻp qirrali hamkorlikni kengaytirish va birgalikda amalga oshirilayotgan loyihalar, tashabbus va dasturlar sonini koʻpaytirishga qatʼiy sodiqligi bildirilgan.
Tadbir dasturi doirasida soʻzga chiqqan HQ hamraislari koronavirus pandemiyasining jahon iqtisodiyotiga salbiy taʼsiriga qaramasdan, rivojlanish surʼatlarini saqlab qolgan ikki mamlakat oʻrtasidagi munosabatlarning barqaror xususiyatini qayd etdilar. Koreya tomoni Oʻzbekistonga ijtimoiy-iqtisodiy rivojlanish milliy dasturlarini amalga oshirishda yordam berishga sodiqligini hamda oʻzaro hurmat asosida va ikki mamlakat manfaatlarini hisobga olgan holda uzoq muddatli strategik sheriklikka tayyor ekanini bildirgan.
Bundan tashqari, investitsiyaviy hamkorlikni yanada kengaytirish, Oʻzbekiston Respublikasi va Koreya Respublikasi oʻrtasida Erkin savdo toʻgʻrisidagi bitim loyihasini ishlab chiqishni jadallashtirish, Oʻzbekistonning JSTga aʼzo boʻlishi borasida maslahatlashuvlarni faollashtirish, qishloq xoʻjaligi mahsulotlari karantini sohasidagi hamkorlik, infratuzilmaviy va energetika loyihalarini amalga oshirish, sanoat kooperatsiyasini yoʻlga qoʻyish, qishloq xoʻjaligi, sogʻliqni saqlash va savdo sohalarida innovatsion texnologiyalarni joriy etish, geologiya-qidiruv, foydali qazilmalarni kavlab olish, metallurgiya va toʻqimachilik sanoati sohalarida hamkorlikni rivojlantirish boʻyicha qator takliflar ishlab chiqildi va har tomonlama koʻrib chiqilgan.
Shuningdek, uchrashuv yakunida tadbir davomida erishilgan asosiy kelishuvlar va ikki davlat oʻrtasidagi koʻp qirrali hamkorlikni yanada chuqurlashtirishning asosiy mexanizmlarini aks ettiruvchi yakuniy bayonnoma imzolangan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!