Shimoliy Koreya hududida yashovchi 7 nafar fuqaro K-pop guruhlariga tegishli kliplarni tomosha qilgani va ularni boshqalarga ham tarqatgani uchun qatl qilingani maʼlum boʻldi.

Janubiy Koreyaning “TJWG” tashkiloti mamlakat hududiga qochib oʻtgan shimoliy koreyalik 700 nafar qochoq bilan gaplashgan va ommaviy qatl maskanlari xaritasini tuzib chiqqan. Kim Chen In davrida amalga oshirilgan qatllarning 7 tasi K-pop guruhlarining kliplarini tomosha qilish bilan bogʻliq boʻlgan.

Taʼkidlanishicha, K-pop guruhlariga muxlislik qilgani uchun jazoga tortilgan fuqarolarning aksariyati Xesan hududida qatl etilgan. Qatl jarayonini jazoga hukm qilinganlarning oila aʼzolari ham kuzatib turishlari majburiy boʻlgan.

Kim Chen In mamlakat hududida Janubiy Koreya filmlari, televizion shoularini tomosha qilish, qoʻshni mamlakat xonandalari tomonidan ijro etilgan qoʻshiqlarni eshitishni taqiqlagan. Mamlakat qonunlariga koʻra, taqiqlangan materiallarni koʻrish, saqlash va tarqatish uchun oʻlim jazosi berilishi ham mumkin.

K-pop – Janubiy Koreyada paydo boʻlgan musiqiy janr boʻlib, u oʻzida elektropop, xip-xop, raqsbop musiqa elementlarini birlashtirgan.

• Shou-biznes
• mashhurlar