Surxondaryoda qarovsiz qoldirilgan “Cobalt” avtomashinasi ichidan pul oʻgʻirlagan ayol qoʻlga olindi. Bu haqda Surxondaryo viloyati IIB matbuot xizmati xabar berdi.

Qayd etilishicha, joriy yilning 21-iyun kuni Surxondaryo viloyatining Angor tumani “Karvon” mahallasida yashovchi T.Karim (ism shariflar oʻzgartirilgan) tuman IIB ga ariza bilan murojaat qilgan.

Jabrlanuvchi oʻz arizasida shu kuni soat 13:00 larda nomaʼlum shaxs tumanning “Tallashqon” mahallasi hududida eshiklari ochiq turgan “Cobalt” rusumli avtomashina ichidan 1.290.000 soʻm pul oʻgʻirlab ketganini maʼlum qilgan.

Shundan soʻng Ichki ishlar organlari xodimlari tomonidan tezkor choralar koʻrilgan va gumondor qidiruvga berilgan. Koʻrilgan tezkor choralar natijasida ushbu jinoyatni Termiz shahrida yashovchi B.Sevinch sodir etganligi aniqlangan va ashyoviy dalillar bilan qoʻlga olingan.

Xabarga koʻra, mazkur holat yuzasidan B.Sevinchga nisbatan Oʻzbekiston Respublikasi Jinoyat kodeksining 169-moddasi 1-qismi bilan jinoyat ishi qoʻzgʻatilgan. Ayni vaqtda tergov jarayoni davom etmoqda.

• IIB
• Jinoyat
• O'g'irlik