O‘zbekiston fuqarolari Rossiya va Ukraina o‘rtasidagi harbiy harakatlarda ishtirok etmaslik haqida ogohlantirildi.

Tashqi mehnat migratsiyasi agentligi Rossiyadagi o‘zbekistonliklarni harbiy harakatlarda ishtirok etmaslikka chaqirdi.

“Rossiya hududida vaqtincha mehnat faoliyatini amalga oshirayotgan O‘zbekiston fuqarolaridan Rossiya va Ukraina o‘rtasidagi ziddiyatli hududlarga jalb qilish haqidagi da’vatlarga ergashmaslikni, ziddiyatli hududlarga bormaslikni va harbiy harakatlarda ishtirok etmaslikni so‘raymiz”, deyiladi xabarda.

Shuningdek, 7-dekabr kuni Moskva shahrining Salaryevo metrosi va Marino aholi punkti oralig‘ida harakatlanuvchi 420-avtobusdagi monitorida urushga chaqiruv e’loni berilgan.

E’londa “Rossiya Qurolli Kuchlarida shartnoma bo‘yicha harbiy xizmatga kirganingizda, siz Rossiya Federatsiyasi prezidenti farmoniga muvofiq, soddalashtirilgan tartibda Rossiya fuqaroligini olishingiz mumkin”, – deb yozilgan.
Qayd etish mumkin, O‘zbekiston Respublikasi Jinoyat kodeksining 154-1-moddasida (chet davlatlarning harbiy xizmatiga, xavfsizlik, polisiya, harbiy adliya organlari yoki shunga o‘xshash boshqa organlariga xizmatga kirish, yollanish) chet davlatlarning harbiy xizmatiga, xavfsizlik, polisiya, harbiy adliya organlari yoki shunga o‘xshash boshqa organlariga xizmatga yollanish uch yildan besh yilgacha ozodlikni cheklash yoxud uch yildan besh yilgacha ozodlikdan mahrum qilish bilan jazolanishi ko‘zda tutilgan.

• Rossiya
• Ukraina
• Urush