Ayollar oʻrtasidagi 2021-yilgi AQSh ochiq chempionati gʻolibi, 19 yoshli britaniyalik tennischi Emma Radukanu (WTA reytingida 18-oʻrin) Avstraliya ochiq chempionatini 2-davradayoq tark etdi.

Mavsumdagi ilk “Katta Dubulgʻa” turkumidagi musobaqada 17-raqam ostida tasniflangan Radukanu Chernogoriya vakilasi WTA reytingida 98-oʻrinni egallab turgan Danka Kovinichga 4:6, 6:4, 3:6 hisobida imkoniyatni boy berdi. Bellashuv 2 soat 38 daqiqa davom etdi.

Endilikda Kovinich chorak finalga chiqish uchun Simona Xalep (Ruminiya, 14) – Beatris Xaddad-Maya (Braziliya) uchrashuvi gʻolibi bilan kuch sinashadi.

Eslatib oʻtish mumkin, Radukanu 10 oʻyinda (saralshda 4 ta, asosiy toʻrda 6 ta) birorta setni yutqazmay chempion boʻlgan US Openʼdagi birinchi ayol tennischiga aylangan edi.

Shuningdek, sportchi “Katta Dubulgʻa” turnirida gʻolib boʻlgach, bir nechta kompaniyalarning yuziga aylangan edi.

Maʼlumot uchun, Avstraliya ochiq chempionatining amaldagi chempioni Naomi Osaka hisobladi. Oʻtgan yilgi finalda u amerikalik Jennifer Bredini 6:4, 6:2 hisobida magʻlub etgan.

• Jahon
• Tennis