Britaniyaning Kardiff universiteti olimlari yuzining bir qismi tibbiy niqob bilan yopilgan yigitlar va erkaklar ayollar tomonidan boshqalarga nisbatan kelishganroq deb qabul qilinishini aniqlashdi.

Pandemiya boshlanguniga qadar oʻtkazilgan tadqiqotlarda tibbiy niqob taqib yurish odamlarning tasavvurida kasal odam qiyofasini aks ettirishi aniqlangan edi. Ammo, oradan vaqt oʻtib, vaziyat oʻzgardi, olimlar tomonidan oʻtkazilgan yangi soʻrovnoma avvalgi natijalarning butunlay teskarisini koʻrsatdi.

“Tadqiqotda yuzning bir qismi niqob bilan yopilgani odamni chiroyliroq koʻrsatishi isbotlandi. Biz niqob taqqanlarga ishonchli odam deb qaray boshladik, shuning uchun ham uni taqqan odamlar bizga yaxshi va koʻrkam insondek koʻrina boshladi”, deydi shifokor Maykl Lyuis.

“Tadqiqot natijalari pandemiyagacha boʻlgan davrda oʻtkazilgan soʻrovnomalar natijasiga mutlaqo ziddir, oʻsha vaqtlarda niqob taqqan odamni koʻrgach, uni kasal deb oʻylab, bu odamga yaqin kelmaslik haqida oʻylaganmiz”, deydi Lyuis. Uning fikricha, pandemiya davri boshlanganidan keyin niqob taqqanlarni ishonchli odamlar deb qabul qilishni boshlaganmiz.

Shuningdek, tadqiqotchilar niqob taqqan holatda asosiy eʼtibor koʻzlarga qaratilgani uchun ham odam chiroyliroq koʻrinishini aytib oʻtishgan.

• pandemiya
• qiziqarli
• tadqiqot