“Sputnik Qirg‘iziston” nashri xabariga ko‘ra, Bishkek va Dushanbe mojaroni to‘xtatish to‘g‘risida bayonnoma imzoladi.

Botkent viloyatidagi “Qizilbel” nazorat-o‘tkazish punktida bo‘lib o‘tgan uchrashuv yakunida ikki mamlakat xavfsizlik qo‘mitalari rahbarlari tegishli bayonnomaga imzo chekkan.

Qayd etish mumkin, Qirg‘iziston-Tojikiston chegarasidagi qurolli to‘qnashuv 14-sentabr kuni boshlangan edi. Tojikiston tomoni ma’lumotlariga ko‘ra, mojaro oqibatida 40 nafardan ziyod respublika aholisi halok bo‘lgan. Bishkek 59 nafar fuqarosi halok bo‘lganini rasman ma’lum qildi.

Avvalroq, Tojikiston-Qirg‘iziston chegarasida barcha harbiy harakatlar to‘xtatilgan edi. Bu haqda Tojikiston tashqi ishlar vaziri Sirojiddin Muhriddin BMT Bosh Assambleyasidagi chiqishi chog‘ida aytib o‘tgan.

Uning so‘zlariga ko‘ra, 19 -sentabr kuni ikki tomonning vakolatli shaxslari vaziyatni tartibga solish bo‘yicha Protokolni imzolagan. Hududlarni birgalikda tekshirish tashkil etilgan.

“Ayni paytda Qirg‘iziston tomoni erishilgan kelishuvlardan chetga chiqib, qo‘shinlar va og‘ir harbiy texnikani o‘zaro to‘qnashuv chizig‘idan olib chiqib ketayotgani, ularni chegaradosh aholi punktlarida yashirayotgani haqidagi yolg‘on ko‘rinishni yaratayotgani afsuslanarli”, – dedi Tojikiston TIV rahbari.

Uning qayd etishicha, chegara hududida sodir bo‘ladigan keyingi har qanday keskinlik uchun javobgarlik to‘liq Qirg‘iziston zimmasiga tushadi.

• Muzokara
• Qirg‘iziston
• Tojikiston