Qozog‘iston prezidenti Qosim-Jomart To‘qayev iyun oyida bo‘lib o‘tgan referendum yakunlari bo‘yicha Konstitutsiyaga o‘zgartirish va qo‘shimchalar kiritish bo‘yicha oltita qonunni imzoladi, deya xabar bermoqda davlat rahbari matbuot xizmati.

Bular Konstitutsiyaviy sud, Inson huquqlari bo‘yicha vakil, Prokuratura to‘g‘risidagi qonunlar, ayrim konstitutsiyaviy qonunlarga, qonun hujjatlariga hamda Ma’muriy huquqbuzarliklar to‘g‘risidagi kodeksga o‘zgartish va qo‘shimchalar kiritishdir.

Qozog‘iston Adliya vazirligida avvalroq tushuntirilganidek, hujjatlarda prezidentning mahalliy ijro etuvchi organlar va Sudyalar oliy kengashiga nisbatan ayrim vakolatlarini qisqartirish, parlamentdagi prezidentlik kvotasi deb ataladigan miqdorni qisqartirish, shuningdek, prezidentlik davrida ma’lum cheklovlarning kiritilishi ko‘zda tutilgan.

Endi Qozog‘iston prezidenti viloyat, respublika ahamiyatiga molik shahar va poytaxt hokimlarini (rahbarlarini) mahalliy deputatlar roziligidan keyin tayinlashi mumkin bo‘ladi. Senatdagi “prezidentlik kvotasi” 15 deputatdan 10 deputatga qisqartiriladi.

Davlat rahbarining siyosiy partiyalarga a’zo bo‘lishi taqiqlanadi, uning yaqin qarindoshlari esa kvazidavlat sektorida (davlatga qarashli korxonalar, shuningdek, sho‘ba, qaram va boshqa korxonalarda ) siyosiy va rahbarlik lavozimlarida ishlay olmaydi.

Ma’lumot uchun, Qozog‘istonda iyun boshida Konstitutsiyani o‘zgartirish bo‘yicha referendum bo‘lib o‘tgan, o‘zgartirishlarni saylovchilarning 77,18 foizi qo‘llab-quvvatlagan. Asosiy qonunga kiritilgan o‘zgartirishlarga ko‘ra, bir shaxs ketma-ket ikki martadan ortiq davlat rahbari etib saylanishi mumkin emas. Prezidentlik muddati esa, 7 yillik etib belgilandi.

• Qozog‘iston
• To'qayev