Toshkent viloyati yoshlariga 5531 gektar yer maydoni dehqonchilik bilan shug‘ullanish uchun ajratiladi. Bu haqida viloyat hokimligi matbuot xizmati xabar berdi.

Ma’lum qilinishicha, Prezident Shavkat Mirziyoyevning 2021-yil 23-noyabrda “Meva-sabzavotchilik va uzumchilikda oilaviy tadbirkorlikni rivojlantirish, qishloq xo‘jaligi ishlab chiqarishida dehqon xo‘jaliklarining ulushini oshirish chora-tadbirlari to‘g‘risida”gi qarori qabul qilingan.

Qarorga ko‘ra, dehqon xo‘jaligi yuritish uchun yer uchastkalarini ochiq tanlov orqali ijaraga berishda “daftar”larda ro‘yxatda turgan ehtiyojmand oilalarga alohida ustuvorlik belgilangan.

Hujjat ijrosi yuzasidan Kadastr agentligining Toshkent viloyati boshqarmasi axborot xizmatining ma’lum qilishicha, hududdagi “daftar”larda ro‘yxatda turuvchi jami 38 mingdan ortiq yoshlarga viloyat hududining 15 ta tumanidan ball boniteti o‘rtacha 60 dan kam bo‘lmagan, jami 5531 gektar yer maydoni ajratiladi.

Bundan ko‘zlangan maqsad yoshlarni band qilish, aholining daromad topish tashabbuslarini qo‘llab-quvvatlash, o‘z biznesini tashkil etishga ko‘maklashish ekani qayd etilgan. Shuningdek, qishloq xo‘jaligi mahsulotlari yetishtirilishida dehqon xo‘jaliklari ulushini oshirish hamda oziq-ovqat xavfsizligini barqarorlashtirish ham ko‘zda tutilgan.

• Toshkent