Norvegiyadan Toshkentdagi 442-ixtisoslashtirilgan bolalar bog‘chasi tarbiyalanuvchilari uchun jo‘natilgan sovg‘alarning bir qismi o‘g‘irlangani aytilmoqda.

“Nilufar” nomli 442-ixtisoslashtirilgan bolalar bog‘chasi xodimasi Galiya Yafarovaning aytishicha, u kecha, 28-dekabr kuni Toshkent shahar Yakkasaroy tumanidagi pochta bo‘limlarining biridan o‘zining nomiga jo‘natilgan jo‘natmani olgan. Mazkur jo‘natma nogironligi bo‘lgan bolalarga yangi yil sovg‘asi sifatida Norvegiya davlatidan jo‘natilgan bo‘lib, unda bolalar uchun paypoq va “kolgotki”lar bo‘lgan.

Bog‘cha xodimasining qo‘shimcha qilishicha, u dastavval, 52 nafar tarbiyalanuvchini xursand qilish maqsadida, jo‘natmani pochta bo‘limidan olishda shoshib, uning butligiga e’tibor qilmagan. Ammo bog‘chaga olib kelingach, uning ichidan 22 dona “kolgotki”lar olib qo‘yilgani ma’lum bo‘lgan. U darhol pochta bo‘limi bilan bog‘lanib, jo‘natmaning jo‘natilish paytidagi suratini olishga muvaffaq bo‘lgan.

Qizig‘i, u qutilarni olganida qutilarda qizil lenta yopishtirilgan bo‘lgan, Norvegiyadan sovg‘a jo‘natilayotgan holatdagi suratlarda esa qutilarda hech qanday lenta yo‘q, hech narsa yopishtirilmagan.

“Sovg‘alar yo pochtada yoki bojxonada talon-toroj qilingan bo‘lishi mumkin. Men va bog‘chaning qolgan hodimlari ham hayratdamiz. Bu qanday bo‘lishi mumkin. Yangi yil oldidan nogiron bolalarning sovg‘alarini o‘g‘irlash uchun odam kim bo‘lish kerak?!” – deydi bog‘cha xodimasi.

Xabardor.uz’ning aniqlik kiritishicha, ayni paytda DBQ mazkur holat bo‘yicha o‘rganish olib bormoqda.

“Tafsilotlarni aniqlashtirish uchun qo‘shimcha ma’lumotlar – buni qaysi kuryerlik firmasi orqali keltirilgan, jo‘natma raqami kabilarga aniqlik kiritayapmiz”, – deydi Davlat bojxona qo‘mitasi xodimi.

Qo‘shimcha ma’lumot:
Tahririyat bu haqdagi xabarni tayyorlash jarayonida Davlat bojxona qo‘mitasi Axborot xizmati qo‘shimcha ma’lumotni taqdim qildi.

Unga ko‘ra, bojxona xodimlarini ushbu bog‘chaga borib vaziyatni o‘rganishgan. Aniqlanishicha, jo‘natma yuborilayotgan mamlakatning o‘zida tegishli bojxona deklarasiyasida yukning og‘irligi 9 kg. 975 gr. deb ko‘rsatilgan. O‘zbekistonga yetib kelgach, o‘lchab ko‘rilganida, biroz og‘ir ya’ni 10 kg. 100 gr. atrofida chiqqan. 
“Ya’ni, bu jo‘natmadagi tovarlar og‘irligi jihatidan kamaymagan”, – deyiladi DBQ bergan ma’lumotda.

• Bojxona
• Jinoyat
• Toshkent