DXX va IIV xodimlari hamkorligida o‘tkazilgan tezkor-qidiruv tadbirda Toshkent shahrida faoliyat yurituvchi mas’uliyati cheklangan jamiyat tomonidan tegishli ruxsatnomaga ega bo‘lmasdan, fuqarolarni “Toshkent-Dubay-Jidda” yo‘nalishi orqali “Umra” ziyoratiga yuborish holati aniqlandi.

Qayd etilishicha, MChJ xodimi X.A. Namangan viloyatida yashovchi ikki fuqaroning ishonchiga kirgan holda ularni 6200 AQSH dollari evaziga “Umra” safariga jo‘natishni va’da qilib, oldindan 3100 AQSH dollari olgan vaqtida ushlandi.

Ma’lum bo‘lishicha, MChJ ofisi va xodimlarining avtomashinalari tekshirilganda, jami 116 nafar fuqaroning xorijga chiqish pasportlari borligi aniqlanib, prosessual tartibda rasmiylashtirib olindi.

Shuningdek, 66 nafar fuqaroni “Umra” safariga yuborish maqsadida ulardan jami 162 ming AQSH dollari olinganligi ham ma’lum bo‘ldi.

Ta’kidlanishicha, MChJ o‘z mijozlarini Birlashgan Arab Amirliklari va Saudiya Arabistoni Qirolligi o‘rtasidagi davlat chegarasidan o‘tkazishda Markaziy Osiyo respublikalarining soxta fuqarolik pasportlaridan foydalanish mexanizmini yo‘lga qo‘ygan.

Hozirda holat yuzasidan Jinoyat Kodeksining tegishli moddasi bilan qo‘zg‘atilib, tergov harakatlari olib borilmoqda.

• DXX
• IIV
• Jinoyat
• Toshkent
• Umra