Mashhur reper Trevis Skottning konsertida yuz bergan tiqilinch tufayli 8 kishi halok boʻlishi ortidan ijodkorni sudga berishdi. Jabrlanganlarning bir nechtasi konsert vaqtida yuz bergan tartibsizlik uchun reper masʼul degan fikrda.

Maʼlum boʻlishicha, sudga shikoyat qilgan fuqarolarning biri 23 yoshli Kristian Paredes boʻlib, u konsert vaqtida olgan jarohatlari va tibbiy xizmatlar uchun reperdan 1 million dollar miqdorida tovon talab qilmoqda. Jabrlanuvchilar toʻpolon vaqtida jiddiy tan jarohatlari olganliklarini taʼkidlashyapti.

Maʼlumot uchun, 5 noyabr kuni Trevis Skott konsert berayotgan vaqtda tiqilinch yuzaga kelgan, buning oqibatida 14 yoshdan 27 yoshgacha boʻlgan 8 kishi halok boʻlgan, 300 dan ortiq odam jarohatlangan edi.

Guvohlarning aytishlaricha, reper nimalar boʻlayotganini sahnadan turib koʻrgan, konsertni bir necha marta toʻxtatgan va jabrlanganlarga yordam koʻrsatishlari uchun qoʻriqchilarni chaqirgan. Reper tiqilinch vaqtda odamlar oʻlgani haqida keyin bilganini taʼkidlagan.

Trevisning ustidan sudga shikoyat qilgan daʼvogarlar esa reper hududga tez yordam mashinalari yetib kelganini koʻrib turgan boʻlsa ham konsertni toʻxtatmagani haqida aytishgan.

• Shou-biznes