Turkiya hukumati Finlyandiya va Shvetsiyaga terrorizmda ayblangan shaxslarning yangi ekstraditsiya ro‘yxatini beradi.

Qayd etilishicha, ertaga, 26-avgust kuni Finlyandiya hududida Xelsinki va Stokgolmning NATOga kirishi boʻyicha maslahatlashuvlar boʻlib oʻtadi. Bu alyans sammitida imzolangan uch tomonlama memorandum doirasida tuzilgan Qoʻshma doimiy mexanizmning yigʻilishidir.

Turkiya tomonidan delegatsiyaga Prezident matbuot kotibi Ibrohim Kalin va mamlakat tashqi ishlar vaziri o‘rinbosari Sedat O‘nal boshchilik qiladi. Ta’kidlanishicha, Anqara hali bajarilmagan 10 nuqtada o‘z majburiyatlarini mamlakatlarga eslatadi.

Shuningdek,  ushbu uchrashuvda Anqara terrorchilarni ekstraditsiya qilish va bajarilishi kerak boʻlgan majburiyatlar borasida qatʼiy pozitsiyada ekanligini yana bir bor taʼkidlashi aytilgan. Terrorchilar ro‘yxati kengaytirilgan va Turkiya ekstraditsiyasini avvalroq so‘ragan fuqarolarning ismlari unga qo‘shilgan.

Avvalroq, Turkiya tashqi ishlar vaziri Mevlut Chavusho‘g‘li NATOga a’zo bir qancha davlatlar Ukrainadagi mojaroning barham topishini istamasligini aytgan edi. Uning so‘zlariga ko‘ra, ba’zi davlatlar, xususan Yevropada ham Ukraina g‘allasini eksport qilish bo‘yicha kelishuvga sabotaj qilmoqchi bo‘lgan.

• Finlyandiya
• NATO
• Shvetsiya
• Turkiya