Turkiyalik arxeologlar Iyerapolis nomi bilan mashhur boʻlgan qadimgi Kastabala shahridagi teatrning qoldiqlarini qazib olish vaqtida komediya va tragediyalar vaqtida foydalanilgan ulkan niqoblarni qoʻlga kiritishdi. Ushbu hudud Turkiyaning janubi-sharqida joylashgan.

Kastabala qadimda Janubiy Onadoʻlining muqaddas shaharlaridan biri boʻlgan. Bu yerdagi koʻchalar, teatrlar, hammom, ibodatxona, tarixiy qasrlarning bir qismi bugungi kunga qadar saqlanib qolgan.

Qadimiy shaharning teatr joylashgan hududidagi qazishma ishlari 2009-yilda boshlangan. Arxeologlar soʻnggi mavsumda komediya va tragediya aktyorlariga tegishli boʻlgan 10 ta niqobni qazib olishgan va topilmalar olimlar davrasida katta shov-shuvlarga sabab boʻlgan.

Mutaxassislar niqoblar oʻsha vaqtlarda teatr asarlarini sahnalashtirishda qoʻllanilgani, ular oʻz davrining madaniy merosi sifatida muhim ahamiyatga ega ekanligini taʼkidlab oʻtishgan.

Teatr Rim davrida qurilgan. Hududdagi qazishma ishlari davomida koʻplab topilmalarning neolit davriga tegishli ekani qayd etilgan. Teatrning yuqori qismidagi koʻtarmani tadqiq qilish jarayonida Kastabala oʻsha davrlardayoq madaniyat markazi boʻlgani aniqlangan.

• Tarix
• qiziqarli