2022-yil 24-iyun O‘zbekiston Respublikasi Tashqi ishlar vaziri v.b. Vladimir Norov Eron Prezidentining Afg‘oniston bo‘yicha Maxsus vakili Hasan Kazemi Kumiyni qabul qildi.

Uchrashuvda Afg‘onistondagi vaziyat yuzasidan fikr almashildi. O‘zbekiston-Eron hamkorligining bugungi holati va uni rivojlantirish istiqbollari, shuningdek, Afg‘oniston masalasi bo‘yicha tomonlarning o‘zaro hamkorligi muhokama qilingan.

Qayd etilishicha, tomonlar Afg‘onistonni mojarodan keyin qayta tiklash, qardosh afg‘on xalqiga gumanitar yordam ko‘rsatish va mintaqaviy jarayonlarga jalb qilish masalalari bo‘yicha konstruktiv muloqotni davom ettirishga tayyor.

Eron tomoni 2022-yil iyul oyida Toshkentda o‘tkazilishi rejalashtirilgan Afg‘oniston bo‘yicha xalqaro konferensiya ishida ishtirok etishini tasdiqlagan.

Muloqot davomida O‘zbekiston va Eron tomonidan Afg‘onistonda infratuzilma, transport va energetika loyihalarini amalga oshirish masalalariga alohida e’tibor qaratilgan.

Ta’kidlanishicha, muzokaralarda O‘zbekiston Prezidentining Afg‘oniston bo‘yicha Maxsus vakili Ismatilla Irgashev ishtirok etgan.

• Afg‘oniston
• Eron
• Prezident
• Vladimir Norov