Xitoylik paleontologlar Yer sayyorasidagi eng qadimiy gul gʻunchasini topishga muvaffaq boʻldilar. Olimlar ushbu topilma kelgusida Yerda yopiqurugʻli oʻsimliklar qachon paydo boʻlganini aniqlashga yordam berishidan umid qilmoqdalar.

Mutaxassislar topilmaga oid maʼlumotlarni genetik tahlil natijalari bilan birgalikda oʻrganib chiqishgan. Tadqiqot xulosalari yopiqurugʻli oʻsimliklar avvallari taxmin qilinganidan chamasi 10 million yillar oldin paydo boʻlganini koʻrsatgan.

Maʼlumotlar “Darvin jumbogʻi”ni yechishga ham yordam berdi. Mashhur olim yopiqurugʻli oʻsimliklar Yer sayyorasida geologik nuqtai nazardan juda tez vaqt – 20-30 million yil ichida paydo boʻlgan va tarqalgan deb hisoblagan. Ammo, Darvin bunchalar katta biologik xilma-xillik aynan nimaga bogʻliq ekanligini tushuntirib bera olmagan. Yangi tadqiqotlar oʻsimliklar evolyutsiyasini avvalgiga nisbatan batafsilroq oʻrganishga imkon berdi.

Xitoylik olimlar tomonidan topilgan gʻuncha “Florigerminis jurassica” sinfiga mansub ekani maʼlum qilingan. Topilmaning oʻziga xos tomoni shundaki, uning nafaqat band qismi va yaproqlari, balki gʻunchaning oʻzi ham butun holatida saqlanib qolgan.

U toʻliq rivojlangan yopiqurugʻli oʻsimliklar Yura davrida ham boʻlganini isbotlaydi. Olimlar bundan avval ham qadimgi davrlardan qolgan gullarning tosh qotgan qoldiqlarini topishgan. Ammo, ularning barchasi yangi namunadan farqli oʻlaroq, butun holida emas, qisman saqlanib qolgan.

• qiziqarli
• tadqiqot