Yaponiyaning Osaki universiteti olimlari neyrodegenerativ kasalliklar rivojlanishining oldini olishga yordam beruvchi preparat ixtiro qilishdi. U jonivorlarda sinab koʻrilgan, tez orada odamlar ishtirokidagi sinov jarayonlari ham boshlanishi maʼlum qilingan.

2016-yilda oʻtkazilgan tadqiqot natijasiga koʻra, rifampitsin antibiotiki organizmida toʻplanib, Altsgeymer kasalligini keltirib chiqaruvchi zaharli oqsilga qarshi samarali kurashishi isbotlangan.

Vosita kasallikning oldini olish, shuningdek salomatlikdagi muammo paydo boʻlgan ilk bosqichlarda qoʻllanilganda ijobiy natijalar bergan. Ammo, uning jigarni zararlashi preparatdan foydalanish imkoniyatini cheklagan.

Olimlar oʻtgan yillar davomida rifampitsinning ana shu zararli jihatini bartaraf etish ustida ishladilar. Buning uchun vosita sprey koʻrinishiga keltirildi, u burun sohasida sepilganida jigarga zarar yetkazmaydi, balki toʻgʻridan-toʻgʻri miyaga yetib boradi. Vosita jigarni zararlamasligi uchun unga resveratrol antioksidanti qoʻshilgan.

Loyihaga professor Takami Tomiyama rahbarlik qilgan. Sinov jarayonlarida spreyning organizmga zarar yetkazmasligi va aqli zaiflikning oldini olishi isbotlab berilgan.

• Yaponiya
• ilm-fan
• ixtiro
• salomatlik