Bosh prokuratura huzuridagi Iqtisodiy jinoyatlarga qarshi kurashish departamenti hamda IIVning Qashqadaryo viloyati boshqarmasi tomonidan tadbirkorlik sub’yektlarining huquqlarini himoya qilish yuzasidan o‘tkazilgan tezkor tadbirda, “K-K.” MCHJ rahbari U.M. va boshqalar “F.B.” MCHJga qarashli 3 gektar yer maydonini tanishlari orqali hokimiyat zaxirasiga qaytarib, keyinchalik 10 nafar fuqaroga dehqon xo‘jaligi uchun 30 sotixdan olib berish evaziga fuqaro J.A.dan 15 000 AQSH dollari olgan vaqtida ashyoviy dalillar bilan ushlangan.

Shuningdek, Departament hamda DXXning Toshkent shahar boshqarmalari tomonidan o‘tkazilgan tezkor tadbirda, fuqaro X.A. fuqaro A.ning ishonchiga kirib, unga yuqori lavozimda ishlovchi tanishlari yordamida Xorazm viloyati, Gurlan tumani Olg‘a qishlog‘ida bo‘sh turgan 1,17 gektar yer maydonini onlayn auksion orqali olib berish evaziga 22 500 AQSH dollarini qo‘lga kiritib, yana 8 000 AQSH dollarini olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.

• Bosh prokuratura
• DXX
• Yer
• Yer-kadastr