Yevropa Ittifoqi Qirg‘iziston va Tojikistonni o‘t ochishni to‘xtatish rejimiga rioya qilishga chaqirdi. Bu haqda tashkilotning tashqi ishlar xizmati saytida chop etilgan bayonotda ma’lum qilindi.

“Umumiy chegara bo‘ylab keskinlashuv mintaqaviy barqarorlikka zarar keltiradi. Yevropa Ittifoqi ikki mamlakatning o‘t ochishni to‘xtatish haqidagi kelishuvini olqishlaydi. Biz har ikki tomonni ushbu kelishuvining imkon qadar tezroq amalga oshirilishini ta’minlashga va keskinlikni pasaytirish va mavjud kelishmovchiliklarga uzoq muddatli yechimga erishish uchun barcha sa’y-harakatlarni amalga oshirishga chaqiramiz”, – deyiladi bayonotda.

Yevroittifoq ham mintaqada barqarorlikka erishish uchun yordam berishda davom etish niyatida ekanini tasdiqladi.

Avvalroq Tojikiston va Qirg‘iziston chegara hududlarida o‘t ochishni to‘xtatish rejimiga rioya etilishini nazorat qilish uchun qo‘shma komissiya tuzgan edi. Bu qaror Tojikiston Milliy xavfsizlik davlat qo‘mitasi raisi Saymo‘min Yatimov va qirg‘izistonlik hamkasbi Qamchibek Tashiyev boshchiligidagi ikki davlat delegasiyalari o‘rtasidagi muzokaralar chog‘ida qabul qilingan.

Komissiyaga Tojikistonning So‘g‘d viloyati rahbari Rajabboy Ahmadzoda va Qirg‘izistonning Botken viloyati raisi Abdikarim Alimboyev rahbarlik qiladi. Qayd etilishicha, komissiya allaqachon ish boshlagan.

Shu kuni Qirg‘iziston va Tojikiston prezidentlari Sadir Japarov hamda Imomali Rahmon chegaradagi vaziyatni muhokama qilgan. Ular tegishli tuzilmalarga o‘t ochishni to‘xtatish, kuch va vositalarni to‘qnashuv chizig‘idan olib chiqish bo‘yicha ko‘rsatmalar berishga kelishib oldilar.

Qayd etish mumkin, Qirg‘iziston va Tojikiston chegarasida 16 sentyabrga o‘tar kechasi vaziyat keskinlashgan. Qirg‘iz-tojik chegarasining butun perimetri bo‘ylab qurolli to‘qnashuvlar sodir bo‘ldi. Qirg‘iziston chegara xizmati tojik askarlari qirg‘iz chegara otryadlarini o‘qqa tutgani haqida xabar berdi. O‘z navbatida, Tojikiston chegara xizmati qirg‘iz harbiylarini ularning bir qator aholi punktlariga hujum qilganlikda aybladi.

So‘nggi ma’lumotlarga ko‘ra, qurolli to‘qnashuvlar chog‘ida yaralangan Qirg‘iziston aholisi soni 87 kishiga yetgan. Shuningdek, 18 mingdan ortiq respublika fuqarolari to‘qnashuv zonasidan evakuasiya qilingani haqida ma’lumot berildi.

• Qirg‘iziston
• Tojikiston